Kya Quran Padhe Tou Amal Karna Padta aur Na Padhe Tou Bach Jatey?

– Quraan Se Doori Ki Ek Intehayi Ghatiya Wajah Yeh Bhi Hai Ke –
“Quraan Padhey Tou Amal Karna Padta Aur Naa Padhe Tou Bach Jatey,..”
Subhan’allah!!

# Agar Wakay Me “Quran Ko Padhey Tou Amal Karna Padta Aur Na Padhey Tou Chal Jata” Iss Usool Ko Maan Ley Tou Hume Batayiye Sabse Pahle Jannat Ka Mustahik Koun ? …
– Jaahir Si Baat Hai Kaafir Hi Jannat Ke Mustahik  Hotey ,.. Wo Tou Kehetey Ke – “Aye Allah Padhna Aur Naa Padhna Tou Bohot Door Ki Baat ! Humko Tou Maloom Hi Na Thi Ke Ye Teri Kitab Hai ,.. Lihaja Hum Tou Tere Azab Se Bari Ho Gaye..” (Subhan’allah)

*Hume Bataye Kya Ye Log Jannat Me Jayenge ?
– Agar Aap Na Kahte Hai Tou Fir Ummid Kaise Karte Hai Ke Hum Bhi Na Padhey Tou Jannat Me Ja Payenge ?
*Darhakikat Ye Shaitan Ka Diya Hua Ek Bahana Hai Jo Usney Allah Ke Qalaam Se Momino Ko Door Karne Ke Liye Diya Hai,..
– Sharm Ki Baat Hai Ye Kitaab Tou Aayi Thi Insaniyat Ke Amal Ke Liye ,..
– Lekin Humne Is Se Doori Ko Apna Shaiwa Bana Liya Hai ..

# Ek Misaal Deta Hu Ke:
Aap Apni Gaadi Lekar Highway Par Gaye, Aap Ko Highway Ke Signal Ka Ilm Nahi Tha, Natijatan Aapne Signal Tod Diya,..
Ab Traffic Policewala Aapse Kehta Hai – “Bhaisahab ! Jurmana Bhariye !”
Aap Kehete Ho Ke – “Kaay Ka Jurmana Sahab? Mujhe Signal Ka Matlab Maloom Nahi Tha.,”
*Ab Hume Batayiye – “Kya Wo Police Officer Aapko Chorr Dega ?”
Jahir Si Baat Hai Ke – Wo Tou Yahi Kahega “Kaanun Ki Lailmi Tumhara Masla Hai, Mera Nahi,.. Jab Tum Highway Par Aaye Tou Tumhara Kaam Tha Highway Ke Kanoon Ko Jan’na,..”

*Lihaja Jab Hum Duniya Me Aaye Tou Apne Aane Ka Maksad Jan’na Farz Hua Humpar,
– Apne Rab Ke Qalaam Ko Samjhkar Padhna Intehayi Jaruri Hai,..
– Warna Log Humari La-Ilmi Aur Jahalat Ka Kis Qadar Fayda Uthatey Hai Ye Bataney Ki Jarurat Bhi Nahi,..

Allah Raabul Izzat Quraan-e-Kareem Me Aise Logon Ke Talluk Se Bayan Farmata Hai –
♥ Al-Quran: “Aur Jo Shakhs Mere Zikr Se Airaz Karta Hai
Uski Zindagi Bohot Tangi Me Basar Hogi
Aur Mai Usko Roze Qayamat Andha Uthaunga”

– [Surah(20) Taha:Aayat:124]

*Tou Lihaja Hume Chahiye ke –
– Apne Rab Ke Zikr Yaani Quraan-e-Majid Se Rishta Jod Ley,..
– Uskey Paigamat Ko Samjhne ke Khatir Uska Muta’ala Karey ,..

♥ In’sha’Allah-Ul-Azeez!!!
# Allah Ta’ala Hume Kehne Sun’ne Se Jyada Amal Ki Taufiq Dey ,..
# Hum Tamam Ke Liye Quraane Majid Ko Padhna, Samjhna Aur Uspar Amal Karna Aasan Farmaye ,..
# Jab Tak Hume Zinda Rakhey Islam Aur Imaan Par Zinda Rakhey…
# Khatma Humara Imaan Par Ho …
!!! Wa Akhiru Dawana Anilhamdulillahe Rabbil A’lameen !!!

Share on:

Leave a Reply

close
Ummate Nabi Android Mobile App