Ummat-e-NabiProud to be Ummat-e-Rasool'Allah (Sallallahu Alaihay Wasallam)

 

 

     
Hidayat Post 1474 results in ( 1.281 seconds)

Sunnat Ki Ahmiyat : Part-10

688 views

☆ Sunnat Ki Ahmiyat : Part-10
Allah Rabbul Izzat Quraan Me Surah Nisa Ki Ayat No.59 Me Farmata Hai:
♥ “Aye Emaanwalo ! Ita’at Karo Allah Ki Aur Uskey Rasool Ki,
Aur Ita’at Karo Unki Jo Ulool Amr Hai
(Isme Khalifa-e-Wakt Aur Ulma Isme Shamil Hai),
Lekin Agar Kisi Muamle Me Ikhtelaaf Ho Jaye
Tou Paltaado Apni Baato Ko Allah Aur Uske Rasool Ki Taraf
Agar Allah Aur Roze Aakhirat Par Iman Rakhte Ho”.
[Al-Quran: Surah Nisa(4); Ayat(59)] – @[156344474474186:]

* Aaj Kitni Baar Aisa Hua Ke Jis Baat Me Humne Ikhtelaaf Paya Aur Usko Allah Aur Uske Rasool Ki Taraf Paltaya ?
Afsos Ki Baat Hai Ke – Aaj Tou Humara Yeh Mu’amla Hai Ke Jis Ikhtelaaf Me Hum Log Mulawwis Hai Usmey Aur Gehrayi Tak Pohochkar Aur Ikhtelaaf Karna Chahte Hai Ummat Me ,..
Islah Ke Bajay Mu’ashre Ko Bigad Dena Chahte Hai. Yehi Tou Humari Haalat Hai Aaj…

*Aur Ikhtelaaf Hota Bhi Hai! Kyu Na Ho ?
Insan Hai! Humari Samajh Aqal Me Ikhtelaaf Hona Mumkin Hai..
Lekin Allah Aur Uskey Rasool (Sallallahu Alaihi Wasallam) Ki Baat
Aaney Ke Baad Sir Kham Kar Dijiye, Ke Bus Mu’amla Khatm Hua…

*Sababao (RaziAllahu Anhu) Ka Bhi Yahi Usool Tha ….
Jab Tak Koi Baat Na Hoti Tou Ikhtelaaf Hota ..
Lekin Jab Allah Aur Uskey Rasool Ki Baat Rakh Di Jaati Tou Fouran Pichey Hatt Jatey
Aur Jaan Letey Ke – “Haa! Mujhsey Khata Ho Gayi, Ab Mai Apni Islah Kar Leta Hu” …

* Lekin Aaj Humara Muamla Yeh Hai Ke
Bus!!! Humne Keh Diya Na! Ab Hum Adey Rahenge !
Fir Chahey Yeh Allah Ke Khilaf Ho,
Rasool’Allah (Sallallahu Alaihi Wasallam) Ke Khilaf Ho,
Shariyat Aur Deen Behar’haal Wo Cheez Jane Dijiye ,
Humne Keh Diya Muamla Tay Ho Gaya ….. (Nauzubillah! Summa Nauzubillah)

* Allah Ke Liye Aisa Mu’amla Naa Ikhtiyar Kijiye …
Tou Behrhaal Jab Bhi Koi Ikhtilaaf Ho,,
Allah Aur Uske Rasool Ki Taraf Uss Cheez Ko Fauran Palta Dijiye,..
Sahi Daleel Kitabo Sunnat Se Hasil Karey
Aur Apni Aur Apne Momin Bhaiyo Ki Islah Karey.
Yahi Allah Aur Uski Hidayat Se Kareeb Hai …

# InshaAllah-Ul-Azeez!!!
# Allah Ta’ala Hume Haq Sun’ne, Samjhne Aur Uss Par Amal Ki Taufiq Dey..

     

Sunnat Ki Ahmiyat : Part-9

328 views

☆ Sunnat Ki Ahmiyat : Part-9
Allah Rabbul Izzat Quraan me Ek Jagah Farmata Hai Ke:
♥ Al-Quran: “Nabi Jo Dey Usey Lelo Aur Nabi Jis’se Rokey Uss Se Rook Jao” - [Surah Hashr(59); Ayat-7]

Tou Yaha Baat Wajeh Hui Ke Rasool’Allah (Sallallahu Alaihi Wasallam) Ke Sunnat Ke Bagair Ab Koi Bhi Amal Allah Ke Nazdik Kaabile Kabool Na Hoga Yaad Rakhiye …
*Chahey Tawheed Par Chaley Lekin Rasool Ki Ita’at Na Ho ,..
*Chahey Namaz Padhey Lekin Rasool Ki Ita-at Na Ho ,..
*Chahey Roza Rakhe Lekin Rasool Ki Ita-at Na Ho ,..
*Chahey Zakaat Dey Lekin Rasool Ki Ita-at Na Ho ,..
*Chahey Din Bhar Ka Koi Muamla Ho, Tijarat Kare, Akhlaq Ho Ya Aadab Ho Agar Rasool Ka Tareeka Nahi Hai Tou Yaad Rakhiye Wo Amal Kaabile Kabool Nahi Allah Ke Paas …

*Tou Yaha Allah Rabbul Izzat Ne Rasool’Allah (Sallallahu Alaihi Wasallam) Ki Ita’at Humpar Wajib Aur Farz Ki Gayi Hai Aur Sahaba Ne Bhi Aisa Hi Samjha Iss Baat Ko… – @[156344474474186:]

*Lekin Kitne Baar Aisa Hota Hai Ke –
Hum Apne Aaba-O-Ajadaad Ke Tareeko Par Amal Ke Liye Rasool’Allah Ki Sunnat Ki Mukhalifat Karne Lag Jatey Hai,..
Fir Chahey Koi Sahi Kitabo Sunnat Se Humari Islah Karne Lag Jaye Fir Bhi Hum Unki Baat Nahi Sun’na Chahtey,..
Yeh Hai Huamara Haal Aaj.. Aur Aesi Gustakhi Karne Ke Baad Bhi Hum Apne-Aap Ko Aashike Rasool, Ahle Imaan Aur Ahle Sunnat Wal Jamat Me Tasawwur Karne Lag Jaatey Hai .. (SubhanAllah!!!)

*Aur Kuch Logon Ka Tou Muamla Ye Hai Ke Rab Par Aur Uskey Din Par Ilzam Lagatey Hai…
Yeh Aqwal Aapne Suney Honge Chotey Aur Badon Se ,.. Baaz Paid Ulemao Se,..
1). Pahla Aqwal: “Ke Janaab Aap Sunnat Ki Baat Karte Hai! Agar Puri Sunnat Rasool’Allah Ki Tumhare Paas Aajaati Tou Tumhara Chalna-Firna, Uthna-Baithna, Khana-Peena Mushkil Ho Jata..

*Jabki Sawaal Tou Yeh Hai Ke Rab Farmata Hai Ke:
☼ “Nabi Jo Dey Usey Lelo Aur Nabi Jis’se Rokey Uss Se Ruk Jao” - (Al-Quran 59:7) Aur
☼ “Aye Musalmano ! Allah Ke Rasool (Sallallahu Alaihi Wasallam) Tumhare Liye Behtareen Namuna (Ideal Aur Role Model) Hai” - (Al-Quran 33:21)
Lekin Hum Tou Kehtey Hai Ke Ye Ideal Tou Hum Tak Pohcha Hi Nahi ,,.. Subhan’Allah !!! ..

Tou Goya Islam Par, Shariyat Par, Rab Ke Din Par Hum Ilzam Lagatey Hai Ke Ye Din Mukammil Nahi Hai, Aur Pura Hum Tak Pohcha Nahi ,..
Jara Soch Lo Bolney Se Pahle! Kisi Giroh Ke Khilaf, Kuch Logon Ke Khilaf Jinko Hum Apna Mukhalif Samjhtey Hai Unko Rokney Ke Chakkar Me Ye Baatey Muuh Se Keh Baithety Hai Aur Samjhtey Bhi Nahi Ke Iska Asar Kaha Tak Hota Hai Ja Kar ..

2). Dusra Aqwal: Aur Dusra Ye Aqwal Ke: Ye Islam Bohot Mushkil Deen Hai ,. Tabhi Tou Kaha Jata Hai Ke Pura Aajata Tou Bohot Mushkil Ho Jata ,.. Tou Hum Kahte Hai Ke Chalo Accha Hi Hai Jo Nahi Aaya Pura ,..
Aur Jo Baaki Hai Wo Bhi Na Padho! Kyunki Padhogey Tou Fir Amal Karna Padhega … Subhan’Allah !!!

Yaad Rakhiye Ye Sab Dhakosley Hai,.. Fitne Hai! Sirf Hume Haq Se Gaafil Rakhney Ke Liye,.. Kitabo Sunnat Se Hume Door Karne Ke Liye Baaz Logon Ne Iss Tarha Ki Aqwale Gadhi Hai Iss Ummat Me ,.. Taaki Wo Deen Ke Naam Par Apni Dukaney Chalaye,..
Lekin Alahmdulillah!! Allah Rabbul Izzat Inki Poley Khol Raha Hai Din-Ba-Din ,…

*Lihaja Allah Ke Liye Hume Bhi Chahiye Ke Jab Koi Kitaabo Sunnat Ki Baat Karey Tau Bagour Suney Aur Samjhe ,…
#Insha’Allah Ul Azeez!!
*Allah Ta’ala Humey Haq Parhne, Sun’ne, Samjhne Aur Uspar Amal Ki Taufiq De ,.. Ameen Allahumma Ameen !!!

To Be Continue …

     

Sunnat Ki Ahmiyat : Part-8

255 views

☆ Sunnat Ki Ahmiyat : Part-8
• Allah Hum Se Kab Mohabbat Karega ??
Aaj Hum Allah Se Mohabbat Ke Liye Tarastey Hai Ke Allah Humse Mohabbat Kare,.. Hum Uskey Mehboob Ban Jaye,.. Tou Aayiye Dekhtey Hai Ke Allah Se Mohabbat Ka Tareeka Kya Hai ?
Ke Allah Kab Hum Se Mohabbat Karega? Allah Khud Quraan Me Apne Bando Se Farmata Hai:
♥ Al-Quran: Tarjuma: Aye Nabi Kehdo In Ahle Kitaab Se, (Mushrikane Makka Se, Yahudiyon Se, Nassaro Se Jo Tamam Ke Tamam Allah Se Mohabbat Ka Dawa Karte Hai) Kehdo In Sabse ! Ke Agar Tum Log Allah Se Mohabbat Ka Dawa Karte Ho Tou Meri Itteba Tum Par Wajib Hai .. - [ Surah Aale Imran: Aayat-31]

*Matlab Ke Agar Allah Se Mohabbat Ka Hum Dawa Karte Hai Aur Ye Samjhtey Hai Ke Allah Humse Mohabbat Kare Tou Rasool’Allah (Sallallahu Alaihay Wasallam) Ki Itteba Humpar Lazim, Farz Shart Hai Uskey Liye ,…

*Kyunki Mushrikin-e-Makka Bhi Kahte Ke Allah Se Hum Mohabbat Karte Hai,
*Yahudi Uss Zamane Me Boltey Ke Allah Se Hum Mohabbat Karte Hai ,..
*Isayi Aur Majusi Bhi Boltey Ke Allah Se Hum Mohabbat Karte Hai ,..
Lekin Allah Ne Paimana Bata Diya Ke Allah Ki Mohabbat Kab Aur Kisko Milegi,
Koun Saccha Allah Se Mohabbat Karta Hai ?
1.Ke Yakinan Wohi Allah Ki Mohabbat Ka Mustahik Banega Jo Uskey Rasool (Sallallahu Alaihay Wasallam) Ki Itteba Karega ,..
2.Aur Dusra Fayda Yeh Hoga Ke Allah Uss Bande Ke Gunaaho Ko Muaf Karega… Aur Allah Tou Muaf Karne Wala Reham Karne Wala Hai ,..
# Lihaja Agar Hum Allah Ki Mohabbat Chahtey Hai Tou Rasool’Allah (Sallallahu Alaihay Wasallam) Ki Itteba Ke Bagair Chara Nahi Yaad Rakhiye Ab ,..

• Allah Hum Par Kab Raham Karega ??
Aaj Hum Allah Ke Reham Ke Mohtaj Hai ,. Aaj Hum Par Zulmo Sitam Ho Raha Hai , Ab Ye Reham Humpar Kab Hoga ? Iskey Taaluk Se Rabbul Izzat Ne Quraan Me Ailaan Kar Diya Ke:
♥ Al-Quran: “Ita-at Karo Allah Ki Aur Uske Rasool Ki Taaki Tum Par Reham Kiya Jaaye” – [Surah Aale Imran: Ayat-132]

Agar Hum Chahtey Hai Ke Allah Hum Par Reham Kare, Uska Karam Humpar Ho Tou Allah Aur Uskey Rasool Ki Ita-at Karni Hogi ..
Tou Agar Aaj Hum Reham Ki Bheek Mangtey Hai Allah Se Aur Agar Humpar Reham Nahi Hota Hai Tou Samajh Jayiye Ke Humne Rasool’Allah (Sallallahu Alaihay Wasallam) Ka Tareeka Chorr Diya …

Lihaja Hum Agar Chahtey Hai Ke Allah Ki Madad Humey Nasib Ho Tou Rasool’Allah (Sallallahu Alaihay Wasallam) Ke Tareeke Ko Apnana Humare Liye Intehayi Jaruri Hai ,…
Khalis Sunnato Par Amal Karna Humare Liye Behad Jaruri Hai ,…

# InshaAllah Ul Azeez !!
Allah Ta’ala Hume Parhne Sun’ne Se Jyada Amal Ki Taufiq Dey!!

To Be Continue ..

     

Sunnat Ki Ahmiyat : Part-7

230 views

☆ Sunnat Ki Ahmiyat : Part-7
Beharhaal Allah Rabbul Izzat Ne Quraan Me Mukhatalif Muqamat Par Rasool’Allah (Sallallahu Alaihay Wasallam) Ki Itteba Ka Hume Hukm Diya,.. Youn Tou Aayate Kayi Hai, Chand Misaaley Sirf Quraan Ke Rakhtey Hue Baat Ko Wajeh Karne Ki Koshish Karta Hu .. – @[156344474474186:]

Allah Raabul Izzat Surah Huzrat Ki Ayat Number 1 Aur 2 Me Farmata Hai Ke:
Al-Quran: “Aye Wo Logon Jo Imaan Laye Ho! Apne Kadam Na Badhao Allah Ke Rasool (Sallallahu Alaihay Wasallam) Se Aagey Aur Allah Se Darte Raho ..”
*Tou Iss Ayat Me Allah Rabbul Izzat Ne Hukm Diya Ke Allah Aur Uske Rasool Ke Hukm Se Aagey Nahi Jana Hai ..
Iski Aagey Ki Ayat (2) Me Allah Ne Farmaya:
“Wo Log Jo Allah Ke Rasool(Sallallahu Alaihay Wasallam) Ke Moujudgi Me Apni Awazo Ko Buland Karte Hai Unhey Khouf Aur Darrna Chahiye Ke Kahi Allah Unkey Tamam Aamal Ko Barbad Na Kardey …”

Iss Ayat Ke Taaluk Se Riwayato Me Aata Hai Ke:
Ek Sahaabi They! Wo Rasool’Allah (Sallallahu Alaihi Wasallam) Ko 2 Din Dikhayi Na Diye.
Rasool’Allah Ne Kaha – ‘Ke Uski Khabar Laao! Wo Kaha Hai?’
Ek Shakhs Nikley Aur Unke Ghar Gaye Aur Pucha Ke – ‘Wo Kaha Hai ?.’

Tou Unki Biwi Ne Kaha Ke – ‘Wo 2 Din Se Ghodo Ke Astabal Me Rotey Hue Baithey Hai,, Aap Jakar Samjhaiye Unhe…’
Jab Unke Paas Pohchey Aur Pucha Ke – ‘Tumahara Kya Mu’amla Hai ? Kyu Ro Rahe Ho ??’
Tou Unohne Kaha Ke – ‘Rabbul Izzat Ne Quraan Ki Aayat Nazil Kar Di Ke “Jo Log Rasool’Allah Ki Moujudgi Me Apni Aawazo Ko Buland Karte Hai, Unhe Darna Chahiye Ke Kahi Unke Amaal Gaarat Na Ho Jaye!” - (Al-Quran; Surah 49.Huzraat:Ayat 1-2)
Aur Meri Aawaz Tou Bohot Unchi Hua Karti Thi, Aur Maine Tou Rasool’Allah Se Aisi Tez Awaaz Me Kayi Baar Baat Ki. Lihaja Mere Amal Tou Gaarat Ho Gaye! Ab Tum Chaley Jao! Mai Tou Halaaq Aur Barbaad Ho Gaya, Mujhe Chorr Do Isi Haal Me.!!
* * * *

Yeh Darr Rakhte They Sahaba – “Ke Rasool’Allah Ki Moujudgi Me Awaaz Bhi Buland Ho Jaye Tou Wo Yeh Tasawwur Karte Ke Amaal Gaarat Ho Gaye ..
Haala Ki Yeh Aayat Baad Me Nazil Hui. Lekin Uskey Baad Kabhi Unhone Tez Aawaz Me Baat Na Ki..

* Yeh Rasoolallah(Sallallahu Alaihay Wasallam) Ka Adab Hai Ke –
Aapki Aawaz Se Unchi Awaz Na Karna Hai,
Aapke Kadam Se Kadam Aagey Na Badhana Hai,

Lekin Humara Mu’mla Tou Yeh Hai Ke –
* Zindagi Ke Tamam Shobey, Kadam Aur Aawaz Tou Door,
Har Mua’mle Me Barkhilaf Jaa Kar Usko Apna Aizaaz, Apna Sha’ar, Aur Apna Alam Samjhtey Hai Ke –
Haa! Yeh Sunnat Ke Khilaaf Amal Karke Hum Sahi Musalman Ho Gaye!!!
* Zindagi Ke Kayi Shobey, Subha Se Lekar Shaam Tak, Shaadi Se Lekar Mout Tak Sab Me Khilafwarji Aur Fir Hum Musalman Ke Musalman Rahey.. Subhaan Allah !! ,..

Lihaja Hume Chahiye Ke Zindagi Ke Tamaam Shobo Me Rasool’Allah (Sallallahu Alaihay Wasallam) Ko Apna Usma-Tul-Hasna (Ideal Aur Role Model) Maaney Aur Aap (Sallallahu Alaihay Wasallam) Ki Sunnato Par Amal Ko Lazim Aur Farz Jaaney ,..

# InshaAllah-Ul-Azeez!!
Allah Ta’ala Hume Parhne Sun’ne Se Jyada Amal Ki Taufiq Dey …

To Be Continue ..

     

Sunnat Ki Ahmiyat : Part-6

267 views

☆ Sunnat Ki Ahmiyat : Part-6
# Mohabbat Kisko Kahte Hai ?
Aayiye Ek Misal De Du Mohabbat Ki… Ke Mohabbat Kisi Cheez Ka Sirf Naam Nahi Mohabbat!! ,.. Balki Mohabbat Ka Matlab Hota Hai Ita-at ,..
Agar Mai Ye Kahu Aapse Ke Mai Apne Walidain Se Mohabbat Karta Hu! Tou Kya Tasawwur Karoge Aap Mere Baare Me ??
Shayad Unki Khidmat Karta Ho, Raato Me Uthkar Pair Dabata Ho, Kabhi Arey-Turey Na Kahta Ho, Uff Bhi Na Karta Ho !!
Yahi Saari Baate Khayal Karoge Na Aap Mere Baare Me?? ..
Matlab Meri Mohabbat Ko Ita’at Me Aap Tasawwur Karoge ..
Lekin Agar Mai Aapse Kahu Ke Mai Apne Walidain Se Mohabbat Karta Hu ! Aur Unko Marta Hu! Tou Kya Aap Isko Mohabbat Kahoge ?? Nahi !! Bilkul Bhi Nahi…

Tou Agar Mai Kehta Hu Ke Rasool’Allah(Sallallahu Alaihay Wasallam) Se Mujhe Mohabbat Hai Tou Ita-at Lazim Hai Uske Sath ,.. Ita-at Ke Bagair Mohabbat Bekaar Hai ..

Lekin Jis Tarha Se Aaj Mohabbat Ke Naare Lagtey Hai.. Subhan’Allah !!
Ita-at Kaha Hai Mere Bhayiyo? Waha Tou Sab Manmani Chal Rahi Hai …
Fir Rasool’Allah Se Mohabbat Ke Dawey Hai ..

Jabki Mohabbat Ka Lazmi Zuz Ita-at Hai, Farmabardari Hai, Itteba Hai ,..
*Uss Tareeke Par Chalna Hai,.. *Uske Pasand Ko Pasand Karna Hai,.. *Uski Napasand Ko Napasand Karna Hai,.. *Uski Acchayi Ko Acchayi Samjhna Hai,.. *Usney Jisko Bura Samjah Usko Bura Samjhna Hai,.. *Usney Jo Kiya Wo Karna Hai,.. *Usney Jo Na Kiya Wo Nahi Karna Hai,.. Ye Hai Mohabbat, Aur Yahi Hai Ita-at !!!

Tou Beharhaal Ye Jaruri Hai Ke Rasoolallah (Sallallahu Alaihay Wasallam) Ko Har Mu’amlo Me Ideal Aur Role Model Banaye Jaisa Ke Quraan Ne Hume Hukm Diya ,… – @[156344474474186:]

Allah Rabbul Izzat Ne Quraan Me Mukhtalif Muqamat Par, Itney Muqamat Hai Ke Humare Liye Ginana Mushkil Hai Jaha Rasool’Allah (Sallallahu Alaihay Wasallam) Ki Itteba Ka Hukm Diya Hume.. Itne Muqamat Jiski Koi Inteha Nahi..

Lekin Iske Bawajud Aaj Ita-at Aur Farmabardari Ke Muamle Me Kya Humara Haal Hai ?
*Ke Aaj Humari Zindagi Ka Koi Bhi Shoba Utha Lijiye Wo Sunnat Se Khaali Hai ,..
Agar Sahaba Iss Dour Me Aa Jatey Tou Shayad Wo Humko Musalman Bhi Na Mantey !!
Ke Kaisa Aajka Musalman Hai Ye: Ke Rasool Ki Sunnato Par Unhoney Jaan Di Aur Ye Aaj Ka Musalman Rasool Ko Rasool Maankar Jaan Dena Tou Door Sunnat Par Amal Bhi Nahi Karta ….

# Sahaba Ki Mohabbat Kaisi Thi Rasool’Allah Se ?
Rasool’Allah Ki Sunnat Aur Aapki Ita-at Aur Aapki Itteba Aur Mohabbat Sahaba Ke Zindagi Me Kaisi Thi Aayiye Ek Hi Wakiye Ke Jarye Bataney Ki Koshish Karte Hai Hum …
*Ye Wakiya Aapne Sirat Me Padha Hai! Ek Sahabi Ko Mushrikaan-e-Makka Ne Giraftaar Kiya Aur Faansi Deney Ka Irada Kiya!!
Kaha Ke: “Imaan Chorr Do Warna Faansi De Di Jayegi!!”
Uss Sahabi Ne Kaha: “Imaan Tou Nahi Chorr Sakta! Faansi Chaho Tou De Do!!”
Wo Kahne Lage Ke: “Accha Chalo Tumko Muaf Kar Dete Hai, Sirf Tum Apne Rasool Ko Gaali De Do…”
Tou Uss Sahabi Ne Jawaab Diya Ke: “Mere Rasool (Sallallahu Alaihay Wasallam) Ko Bura Bhala Kehna Tou Door, Rasool’Allah Ko Kaanta Bhi Chubh Jaye Wo Tasawwur Bhi Nahi Kar Sakta Mai ,.. Tumko Jo Chahey Mere Sath Karna Hai Karo..” Aur Unko Faansi De Di Gayi Aur Shaheed Kar Diya Gaya …

Tou Rasool’Allah(Sallallahu Alaihay Wasallam) Ki Itteba Aur Mohabbat Kaisi Thi Sahaba Ke Zindagi Me! Ke Rasool’Allah Ko Kaanta Bhi Chubh Jana Mohal Tha Unke Liye ,..
Lekin Aaj Itteba-e-Rasool, Kalma-e-Rasool Padhkar Aaj Tamam Zindagi Ke Shobey Hum Uske BarKhilaaf Jaatey Hai..

Aur Sahaba Ka Wo Jasba Tha Ke Unki Jindagi Ka Koi Shoba Sunnat Se Khaali Na Tha..
Haa! Agar Koi Baat Maloom Na Thi Tou Wo Tehqeek Kar Letey, Dusro Se Puch Letey Aur Apni Islah Kar Letey …

*Lihaja Hume Bhi Chahiye Ke Apne Zindagi Ke Tamam Shobo Me Rasool’Allah (Sallallahu Alaihay Wasallam) Ki Itteba, Farmabardari Ko Lazim Aur Farz Jaaney …

# InshaAllah-Ul-Azeez!! Allah Ta’ala Hume Parhne Sun’ne Se Jyada Amal Ki Taufiq Dey …

To Be Continue ..

     

Sunnat Ki Ahmiyat: Part-5

317 views

☆ Sunnat Ki Ahmiyat : Part-5
» Mehfum-e-Hadees: Farman-e-Mustafa (Sallallahu Alaihay Wasallam) Hai Ke –
“Jo Shakhs Meri Ummat Tak Koi Islami Baat Pohchaye Taki Uss Se Sunnat Qaayam Ki Jaye Ya Uss Se Bad’Mazhabi Door Ki Jaaye Tou Woh Jannati Hai”. – (Tirmizi Sharif)

Gour Karne Waali Baat Hai Ke Rasool’Allah (Sallallahu Alaihay Wasallam) Uss Shakhs Ko Jannat Ki Basharat Dey Rahe Hai Jiska Tou Hum Mazak Udatey Hai!.. Jabki Hum Saochtey Tak Nahi Ke Hakikat Me Hum Kiska Mazaq Udatey Hai ..

# Sunnat Ka Mazak Udaney Se Ahtiyat Kare:
Aaj Agar Koi Sunnato Par Amal Ki Baat Karta Hai Tou Log Uska Mazak Udatey Hai !!
Allah Ke Liye, Jab Koi Shakhs Koi Baat Kahe Tou Kum-Se-Kum Kaan Dhar Dijiye, Koshish Kijiye Ke Usney Kaha Se Ki Wo Baat, Puch Lijiye ,..
Kahi Aisa Na Ho Ke La-Ilmi Me Mai Uski Baat Ka Mazak Uda Du Aur Baad Me Pata Chaley Ke Rasool’Allah (Sallallahu Alaihi Wasallam) Ki Sunnat Thi, Fir Baadme Mujhe Zindagi Bhar Pachtana Padey, Ke Kyu Maine Mazak Udaya Mere Rasool’Allah (Sallallahu Alaihi Wasallam) Ki Sunnat Ka ,..

Beharhaal Nabiyon Ki Ba’asat Ka Maksad Unki Ita-at Hai,.. Aur Rasool (Sallallahu Alaihi Wasallam) Ki Ba-Asat Ka Maksad Bhi Yahi Hai, Aapko Allah Rabbul Izzat Ne “Ideal Aur Role” Model Banaya Hai ,.. Lekin Aaj Rasool’Allah Ki Taalimat Ko Humne Chorr Diya Aur Uska Natija Kya Hua Hum Sabhi Dekh Hi Rahe Hai ,..

# Jisne Sunnat Se Mohabbat ki Wo RasoolAllah Ke Sath Hai:
Rasool’Allah (Sallallahu Alaihi Wasallam) Ke Paas Ek Ansari Sahabi Aaye ,.. Wo Ghumjada They Bohot ,..
Rasool’Allah Ne Unki Pareshani Ka Sabab Pucha,
Tou Unhone Kaha – “Aye Allah Ke Rasool (Sallallahu Alaihay Wasallam)! Ek Gham Mujhe Khaye Ja Raha Hai, Ke Mai Yeh Sochta Hu Ke Aaj Dunia Me Aapka Chehra Mubarak Dekhey Bagair Hum Reh Nahi Patey, Chalte Aur Firtey, Uthtey Aur Baithtey Jab Bhi Aapki Yaad Aati, Aapse Aakar Hum Mil Letey Aapka Didaar Karte Aur Hume Sukun Milta Hai ..
Lekin Mai Yeh Soch Kar Gham Kha Raha Hu Ke Roze Qayamat Tou Aap Ambiya (Alaihi Salaam) Ke Sath Hongey, Waha Tou Hum Aapka Didaar Na Kar Payenge …
Rasool’Allah (Sallallahu Alaihay Wasallam) Khamosh Rahey …
Tabhi Aap (Sallallahu Alaihay Wasallam) Par Yeh Aayat Nazil Hoti Hai ..
♥ Al-Quraan: “Jo Koi Allah Aur Rasool Ki Farmabardari Kerega Woh (Roze Qayamat) Unn Logon Ke Sath Hoga Jin Per Allah Ta’ala Ne Inaam Kiya Hai! Jaisey Nabi Aur Siddique Aur Shaheed Aur Nek Log Yeh Behtareen Rafiq Hai”. - (Surah 4 Nisa: Ayat 69)

Aur Fir Rasool’Allah (Sallallahu Alaihay Wasallam) Ne Farmaya –
» Hadees: “Al-Maru Ma’ Man Ahab”
“Insan (Qayamat Ke Din) Uskey Saath Jis Sey Wo Mohabbat Karta Hai”.
– (Sahih Bukhari, Vol 8, Book 73, No. 189) – @[156344474474186:]

Aur Anas Bin Malik(RaziAllahu Anhu) Kehte Hai Ke, Iss Hadees Ko Sun’ne Se Jyada Hume Kabhi Kisi Aur Hadees Par Itni Khushi Nahi Hui.
Ke Insan Uske Sath Jis’se Wo Mohabbat Karta Hai!
Aur Hum Jantey Hai Ke Hum Rasool’Allah Se Mohabbat Karte Hai, Lihaja Humara Hisaab Bhi Rasool’Allah Ke Sath Hoga,..

* Tou Jisney Rasool’Allah Se Mohabbat Ki Yaani Rasool’Allah Ki Ita-at Ki. Wo Rasool’Allah Ke Sath Hai ,..
* Jisney Filmstaro Ki Itteba Ki Unsey Mohabbat Ki, Unkey Tareeko Ko Apnaya, Wo Unke Sath Hoga ,..
* Jisney Sportstars Ko Pasand Kiya Unkey Tareeke Par Chala Wo Unke Sath Hai ,..
* Jisney Kuffaro Ko Pasand Kiya, Unkey Tarsh Ko Apnaya Aur Unkey Tareeko Par Chala Wo Unkey Sath Hai..

♥ InshaAllah Ul Azeez !!!
# Allah Ta’ala Hume Rasool’Allah (Sallallahu Alaihi Wasallam) Ki Sunnato Ka Muttabe Banaye,
# Jab Tak Hume Zinda Rakhey Islam Aur Imaan Par Zinda Rakhye…
# Khatma Humara Imaan Par Ho …
!!! Wa Akhiru Dawana Anilhamdulillahe Rabbil A’lameen !!!

To Be Continue …

     

Nikah Me Rangat Ka Tassuf Kaha Tak Durust Hai ?

372 views
Roman Hindi
हिंदी

☆ Nikah Me Rangat Ka Tassuf Kaha Tak Durust Hai ?
» Jawaab: Aksar Dekha Jata Hai Ke Nikah Ke Liye Gori Aur Khubsurat Ladki Ka Intekhab Karna Kuch Jyada Hi Aham Samjha Jata Hai, Tou Kya Wakay Me Shariyate Islamiya Rangat Ka Tassuf Pasand Karta Hai ?

Aayiye Iski Hakikat Dekhte Hai Ke: Kya Wakay Me Islam Ne Rangat Ke Aitbaar Se Bhi Kabhi Tasuf Pasand Kiya ?
♥ *Sabse Pahli Baat Ke: Rabbul Izzat Surah Luqman Ki Ayaat 22 Me Farmata Hai Ke –
“Tumhare Zubaan Aur Rango Ka Ikhtelaf Bhi Allah Ki Nishani Hai” - (Al-Quran:31:22)

*Lekin Beharhaal Agar Koi Ye Pasand Kare Ke Uskey Nikah Ke Liye Khubsurat (Gori) Ladki Miley Tou Isme Koi Harz Nahi,..
Lekin Harz Yaha Hota Hai Ke Deendaari Aur Akhlaq Wo Tamam Cheezo Ko Chorrkar Sirf Khubsurati Aur Gorey Rang Ko Tarji Di Jati Hai …

Aur Jo Log Nikah Ke Muamle Me Deen Ko Tarji Nahi Detey Unke Hath Kya Lagta Hai Beharhaal Bataney Ki Jarurat Bhi Nahi ..
Aur Yahi Hota Hai Jo Deen Ko Tarji Nahi Detey Aur Duniya Ke Sab Muamlo Me Ulztey Hai Ke, Ladki Ka Rang, Uske Khandan Ka Rang, Uska Nanhiyaal Aur Dadiyal, Falah Aur Falah Hazaar Tehkik Ki Jaati Hai … Subhan’Allah!!

Jabki Deendaari Hi Sabse Awwal Hai ! Uske Baad Sabkuch Mil Jaye, Alahmdulillah! Shariyat Gorey Rang Aur Khubsurti Ke Khilaf Nahi Hai ,…
Lekin Deendari Na Ho Aur Baaki Sab Kuch Ho,.. Nahi Chalega Mere Bhaiyo Yaad Rakhiye ,..
Fir Baadme Pachtatey Hai, Rotey Hai Ke Yeh Nahi Hora ,.. Wo Nahi Hora ,..

Tou Deendari Ko Tarji Dijiye ,..Deendar Ladki Hogi Tou Aulad Deendar Hogi, Marne Ke Baad Sawabe Jariya Banegi ,..
Aur Deendar Aulad Tou Badi Aham Cheez Hai,.. Jo Marne Ke Baad Humare Liye Dua-e-Magfirat Karengi ..
Tou Aesi Aulad Agar Chahte Hai Tou Nek Ladki Ka Intekhab Kare,.. Fir Rangat Unke Chahe Jaise Ho ,..

Aur Mehfum-e-Hadees Hai Ke:
♥ Rasool’Allah (Sallalaho Alayhi Wasallam) Farmatey Hai Ke:
“Aurat Se 4 Cheezo Ki Wajahse Nikah Kiya Jata Hai,
» 1. Uska Maal
» 2. Husn Wa Jamal
» 3. Uska Khandan
» 4. Uski Deendari.
Lekin Tum Deendari Ko Thaam Lo”
– (Bukhari: Jild 3, Safa 59) – @[156344474474186:]

Lihaja Nikah Me Rangat Ka Usool Choriye Aur Deendari Ko Lazim Banayiye Jo Duniya Aur Aakhirat Ki Kamiyabi Ka Sabab Baney …
# Insha’Allah-Ul-Azeez !!
Allah Ta’ala Hume Parhne Sun’ne Se Jyada Amal Ki Taufiq Dey ..
# Jab Tak Hume Zinda Rakhey Islam Aur Imaan Par Zinda Rakhye…
# Khatma Humara Imaan Par Ho …
!!! Wa Akhiru Dawana Anilhamdulillahe Rabbil A’lameen !!!

☆ निकाह में रंगत का तास्सुफ़ कहाँ तक दुरुस्त है?
» जवाब: अक्सर देखा जाता है की निकाह के लिए गोरी और खूबसूरत लड़की का इंतेखाब करना कुछ ज़्यादा ही अहम समझा जाता है, तो क्या वाकई में शरीयते इस्लामिया रंगत का तास्सुफ़ पसंद करता है? आईये इसकी हकीकत देखते है की: क्या वाकई में इस्लाम ने रंगत के एतबार से भी कभी तास्सुफ़ पसंद किया?

*सबसे पहली बात की: रब्बुल इज़्ज़त सूरह लुक़्मान की आयात २२ में फ़रमाता है की –
♥ “तुम्हारे ज़ुबान और रंगो का इख्तिलाफ भी अल्लाह की निशानी है” - (अल-क़ुरान ३१:२२)
लेकिन बेहरहाल अगर कोई ये पसंद करे की उसके निकाह के लिए खूबसूरत (गोरी) लड़की मिले तो इसमें कोई हर्ज़ नहीं ,..
लेकिन हर्ज़ यहाँ होता है की “दीनदारी और अखलाक़” वो तमाम चीज़ो को छोड़कर सिर्फ खूबसूरती और गोर रंग को तर्जी दी जाती है ,..

और जो लोग निकाह के मुआमले में दींन को तरजी नहीं देते उनके हाथ क्या लगता है बेहरहाल बताने की ज़रूरत भी नहीं ,…
और यही होता है जो दींन को तर्जी नहीं देते और दुनिया के सब मुआमले में उलझते है की: “लड़की का रंग, उसके खानदान का रंग, उसका नन्हीहाल और ददिहाल फलाह और फलाह हज़ार तहक़ीक़ की जाती है” सुभान’अल्लाह!!

जबकी दीनदारी ही सबसे अव्वल है! उसके बाद सबकुछ मिल जाए अलहम्दुलिल्लाह! शरीयत गोरे रंग और खूबसूरती के खिलाफ नहीं है ,…
लेकिन दीनदारी ना हो और बाकी सब कुछ हो! नहीं चलेगा मेरे भाइयों याद रखिये फिर बादमे पछताते है, रोते है की: यह नहीं हो रहा और वो नहीं हो रहा !

तो दीनदारी को तर्जी दीजिये! दीनदार लड़की होगी तो औलाद दीनदार होगी, मरने के बाद सवाब-ए-जारिया बनेगी! और दीनदार औलाद तो बड़ी अहम चीज़ है जो मरने के बाद हमारे लिए दुआ-ए-मगफिरत करेगी !
तो ऐसी औलाद अगर चाहते है तो नेक लड़की का इंतेखाब करे फिर रंगत उनके चाहे जैसे हो ,..

♥ और मेह्फूम-ए-हदीस है की:
रसूल अल्लाह (सल्लल्लाहु अलैहि वसल्लम) फरमाते है की:
“औरत से ४ चीज़ों की वजह से निकाह किया जाता है,
१. उसका माल
२. हुस्न और जमाल
३. उसका खानदान
४. उसकी दीनदारी
लकिन तुम दीनदारी को थाम लो” - (बुखारी: जिल्द ३, सफा ५९) – @[156344474474186:]

लिहाज़ा निकाह में रंगत का उसूल छोड़िये और दीनदारी को लाज़िम बनाइये जो दुनिया और आख़िरत की कामियाबी का सबब बने ,…
# इंशा अल्लाह-उल-अज़ीज़ !!
*अल्लाह तआला हमे पढ़ने सुनने से ज़्यादा अमल की तौफ़ीक़ दे ,..
*जब तक हमे ज़िंदा रखे इस्लाम और ईमान पर ज़िंदा रखे ,..
*खात्मा हमारा ईमान पर हो ,..
!!! वा आखीरु दावाना अनिल्हम्दुलिल्लाहे रब्बिल अ’लमीन !!!

     

Sunnat Ki Ahmiyat: Part-4

434 views

☆ Sunnat Ki Ahmiyat : Part-4
» Mehfum-e-Hadees: Rasool’Allah (Sallallahu Alaihay Wasallam) Ne Ek Roz Farmaya Ke –
“Mere Jaanshino Par Allah Ki Rehmat Ho!”
Arz Kiya Gaya: “Ya RasoolAllah Aapke Jaanshin Kon Hain?”
Farmaya: “Jo Meri Sunnat Se Mohobbat Rakhte Hain Aur Usey Allah Ke Bando Ko Sikhate Hai.”
– (Tafsir-e-Kabir) – @[156344474474186:]

Afsos Ki Baat Hai Ke Aaj Humne Khud Rasool’Allah(Sallallahu Alaihay Wasallam) Ki Sunnat Ko Samjhne Se Airaz Kiya Aur Badley Me Jo Bhi Wirasat Se Hume Akide Miley Bus Uspar Aankh Bandh Karke Amal Karne Lag Gaye ,.. Fir Chahe Wo Amal Rasool’Allah Ki Sunnat Ke Kitne Hi Khilaf Kyu Na Ho Uski Tehkik Karna Jaruri Nahi Samjha Aur Humne Deen Me Masumiyat Ikhtiyar Kar Li ,..

# Kyu Deen Me Masumiyat Ikhtiyar Ki Humne ?
Aaj Jab Sunnat Ki Baat Hoti Hai .. Sunnat Par Amal Ke Liye Bulaya Jata Hai Tou Pahle Tou Sunnate Manmani Ijad Ki Gayi.. Aur Agar Koi Sawaal Kare Ke Bhai Ye Kaha Se Laye Ho ?
Tou Kahte Hai Ke “Tum Tou Mereko Bhatke Hue Dikh Rahe!!!”
Kyunki Ke Tumne Sawal Kiya,.. Aur Humne Tou Apne Baap-Dada Se Sawaal Nahi Kiya Aajtak,.. (Subhan’Allah)!!

Tou Jo Logo Ko Deen Ke Mu’amlo Me Sawal Karne Se Rokte Hai Unsey Mai Puchna Chahunga Ke: “Kya Aisi Masumiyat Humne Duniya Me Bhi Ikhteyar Ki ?? “

*Jab Duniya Me Aqal Lada Rahe Hai Hum, Pata Hai Ke Ladki Acchi Na Ho Aur Mujhe Pakda Di Jaye Tou Mai Fass Jaunga Zindagi Bhar!
*Tou Fir Ye Kyu Nahi Sochtey Hum Ke: “Sunnat-e-Rasool Se Hatkar Jis Kisi Bhi Akide Par Mai Rahunga, Tou Mai Qayamat Ke Deen Kya Jawaab Dunga Apne Rab Ko???”

Tou Yaha Jawabdehi Ka Madda Hai,.. Waha Ki Jawabdehi Bhul Gaye Hum???
Isliye Ke Yaha Cash Dikh Raha Hai ,.. Aur Wo Tou Udhar Ka Muamla Hai Na ,.. Qayamat Dikhi Nahi Hai Abhi.. Aur Aakhirat Aayi Nahi ,..
*Lekin Yaad Rakhiye Yeh Bohot Jyada Nazdik Hai Humse,.. Kab Mout Aajayegi Hume Pata Nahi ,..
*Pata Nahi Pichley Ramzan Kitne Log Humare Contact Me They, Aaj Nahi Hai Aur Agle Ramzan Tak Ho Sakta Hai Bohot Se Hum’me Se Naa Ho ,..

*Tou Iss Se Pahle Ke Koi Bhi Kaam Karu Duniya Me Jo Tehkik Ka Madda Hai Deen Me Bhi Usko Istemaal Karu, Jaanchu Aur Parkhu ,.. Kahi Aisa Tou Nahi Ke Mai Khamoshi Se Aankh Band Kar Kisi Ke Pichey Lag Gaya Aur Usney Le Jakar Gaddhe Me Mujhe Gira Diya …

*Tou Duniya Me Jaisi Tehkik Karte Hai Waisi Tehkik Deen Me Bhi Kijiye ,..
Ab Mai Yeh Nahi Keh Raha: Ke Har Ek Ko Bohot Bada Allama Ban’ne Ki Jarurat Hai,
Lekin Aap Choti-Moti Baatey Tou Jaan Sakte Hai ,.. Jo Kum Se Kum Faraiz Se Tou Muttalik Ho ,.

#Misaal Ke Tour Par: Aajka Mu’amla Tou Yeh Hai Ke, Agar Koi Shakhs Kahe Ke – “Safbandi Ke Aadab Yeh Hai ,.. Safey Aisi Ho”
Go Ke Ulemao Ki Baate Hazar Baar Sunn Rahe Hai Hum, Safbandi Ke Aadab Bataye Ja Rahe Hai,
“Ke Saff Aisi Ho, Saffo Me Jagah Na Ho ,.. Kaandhe Se Kaandha Lagey, Kadam Se Kadam Milakar Rakho,.. Shaitan Ko Bich Me Aane Na Do, Sino Ko Bahar Na Nikalo!!!”
Rasool’Allah (Sallallahu Alaihi Wasallam) Ke Talluk Se Riwayato Me Aata Hai Ke Rasool’Allah Neza Letey Aur Saffo Ko Durust Karte Imamat Se Pahle, Fir Ja Kar Khadey Hotey Aur Farmatey Ke: “Saffo Ko Durust Karna Namaz Ke Qayam Karne Me Hai”

Lekin Agar Aaj Koi Boley Ke Saffo Ko Durust Karo! Fouran Usey Logon Se Jawab Milta Hai: “Tum Tou Falah Jamat Se Lag Rahe Hume!!!” Subhan’Allah
Jab Ki Yeh Tou Sunnat Hai Rasool’Allah (Sallallahu Alaihi Wasallam) Ki,
Kyu Humne Sunnato Ko Bhi Baat Diya Alag-Alag Aitbar Se??
Jamati, Ilaqayi, Rangat Ke Aur Mulko Ke Aitbaar Se??? Ye Humari Aaj Halat Ho Gayi Sunnat Ke Muamlo Me,..

Lihaja Allah Ke Liye Baat Ko Samjhey, Halaat Ko Samjhey Aur Jitna Ho Sakey Rasool’Allah (Sallallahu Alaihi Wasallam) Ki Sunnato Par Khud Bhi Amal Karey Aur Logon Ko Bhi Uski Dawat Dey ….
#InshaAllah-ul-Azeez!! Allah Ta’ala Hume Parhne Sun’ne Se Jyada Amal Ki Taufiq Dey ..

To Be Continue …

     

Sunnat Ki Ahmiyat: Part-3

400 views

☆ Sunnat Ki Ahmiyat : Part-3
♥ Mehfum-e-Hadees: Rasool’Allah (Sallallahu Alaihay Wasallam) Ka Irshade Mubarak Hai Ke:
“Jisne Meri Sunnat se Mohabbat ki Usney Mujhse Mohabbat Ki, Aur Jisne Mujhse Mohabbat ki Wo Jannat me Mere Saath Hoga.” - (Mishkaat H#165)

# Lekin Aaj Sunnat Par Amal Karme Walo Ko Ajnabiyat Se Dekha Jata Hai:
Aaj Sunnat-e-Rasool Ko Humne Mazak Samjha ,.. Khilwaad Ka Mouju Banaya ,..
Ke Agar Koi Ita-ate Rasool Aur Ittebaye Rasool Ki Baat Kahe,
Ya Ye Kahe Ke Allah Ki Kitab Aur Uskey Rasool (Sallallahu Alaihi Wasallam) Ki Baat Maano
Tou Us’sey Kaha Jata Hai Ke “Tum Tou Bhatak Gaye Ho ,.. Tum Tou Falah Firqe Ke Lag Rahe Hume ,..” Subhan’Allah
Aur Tamam Mu’ashra Usko Ghur-Ghur Kar Dekhta Hai ,…
Tou Iss Sunnat Par Bhi Amal Giraa Hai Aaj Iss Mu’ashre Me …
*Iske Baad Aur Sunnato Ki Taraf Jaye Wo Tou Ajnabiyat Ka Muamla Ho Jata Hai ,..

# Ek Shakhs Islam Par Chalkar Apne Hi Mu’ashre Me Ajnabi Ho Jata Hai
Agar Wo Shakhs Logon Ko Kitabo Sunnat Ki Dawat Deney Lag Jaye Tou Tamam Mu’ashra Usey Ghur-Ghur Kar Dekhta Hai ,…
Ke Kya Ho Gaya Isey? Koun Hai Ye ? Ye Tou Humare Baba-Dada Ke Tareeke Ke Khilaf Ja Raha Hai ,…
Tum Tou Gumraah Ho Gaye Ho ,.. Tumhara Iman Tou Khatam Ho Gaya,..
Falah Aur Falah Hazaar Baatey Us’sey Ki Jaati Hai Jabki Wo Aisi Sunnat Par Amal Kar Raha Hai Jo Buniyaad Hai Deen-e-Islam Ki ,… Jo Sunnat Hai Rasool’Allah (Sallallahu Alaihi Wasallam) Ki ,…

Aur Uski Mukhalifat Bhi Wo Log Karna Pasand Karte Hai Jo Na Apni Islah Chahte Hai Aur Na Apne Muashre Ki,..
Aur Aise Logon Ko Hi Kitabo Sunnat Ki Baatey Apne Baad-Dada Ke Deen Ke Barkhilaf Aur Nayi Lagti Hai …

*Aur Aaj Tou Yeh Baat 100% Sach Ho Rahi Hai Ke: Koi Shakhs Agar Sunnat Ki Baat Karta Hai Tou Log Kahte Hai Ke Yeh Tou Nayi Baat Dikh Rahi Hai ,..
Tou Nayi Wo Nahi! Jo Aapne Suni ,.. Nayi Tou Wo Hai Jo Aap Kar Rahe Hai ,..

Kyunki Asal Baat Tou Wo Hai Jo Allah Ki Kitab Aur Uske Rasool (Sallallahu Alaihi Wasallam) Ki Sunnat Me Moujud Hai ,…
Agar Wo Moujud Hai! Jab Thi Tou Aaj Tak Utni Hi Haq Hai Aur Qayamat Tak Utni Hi Haq Hongi ,..
Fir Chahe Koi Amal Kare Uspey Ya Na Karey ,.. Wo Baat Utni Hi Sach Sabit Hogi Har Dour Me ..

*Chahe Fir Mu’amla Tawheed Ka Ho, Namaz Ka Ho, Rozo Ka Ho, Zakat Aur Hajj Ka Ho!
Tamam Me Agar Koi Kahe Ke: “Ye Sunnat Hai” Tou Usey Jawab Milta Hai Ke “Tumne Tou Nayi Baat Keh Di !”
Jabki Nayi Wo Nahi Hai Jo Wo Kitabo Sunnat Ke Hawale Se Keh Raha Hai,
Nayi Tou Wo Hai Jo Hum Kar Rahe Hai Aaj Zamane Me ,..
Aur Agar Rasool’Allah (Sallallahu Alaihi Wasallam) Ki Sunnat Se Wo Amal Sabit Hai Tou Wo Baat Utni Hi Behtar Aur Haq Hai Jitna Ke Rasool’Allah (Sallallahu Alaihi Wasallam) Aur Ye Deen Hai Utna Hi Haq Hai ,..

Aur Agar Rasool’Allah Ki Sunnat Me Wo Baat Nahi! Tou Fir Jaan Lijiye Ke Pura Mu’ashra Bhi Agar Wo Kaam Kare Wo Kabhi Kaam Durust Nahi Ho Sakta …

# Kya Islam Me Aksariyat Aur Aqaliyat Ka Koi Taqaza Hai ?:
Aksar Logon Se Sawal Kiya Jata Hai Ke Falah Amal Jo Aap Karte Ho Kya Wo Kitabo Sunnat Se Sabit Hai?
Tou Jawab Me Hume Milta Hai ke: Aksar Log Tou Ye Amal Karte Hai ,.. Itne Sare Log Galat Kaise Ho sakte Hai ?? Lihaja Yakinan Yeh Amal Sahi Hoga … – @[156344474474186:]

*Yaad Rakhiye Agar Ek Fard Bhi Iss Duniya Me Sacche Islam Par Amal Kare Tou Wo Haq Par Hai,.. Aksariyat Aur Aqaliyat Ka Islam Me Koi Taqazq Nahi ,..
Isliye Ke Jab Islam Duniya Me Aaya Sirf Ek Shaksh Ke Jehan Me Wo Baat Thi Yaani Rasool’Allah (Sallallahu Alaihi Wasallam)! Aur Puri Duniya Aapke Khilaf Khadi Thi !
Majud, Yahud, Nassara Aur Mushrikan-e-Makka Tamam Ke Tamam Aap (Sallallahu Alaihi Wasallam) Ko Ajnabiyat Se Dekh Rahe They! Ke Isney Kya Baat Layi Hai ??? Yeh Tou Humare Khilaf Ja Raha Hai ,..

Tou Ek Fard-e-Wahid Ke Jehan Me Wo Cheez Hai Jisko Islam Hum Samjhtey Hai, Waha Se Wo Baat Nikalti Hai Agar Aqaliyat Aur Aksariyat Ka Taqaza Hota Tou Usi Wakt Islam Khatm Kar Dena Chahiye Tha Allah Ne,.. Isliye Ke Aksariyat Tou Puri Shirk Me Mulawwis Thi …
*Tou Shairyat Me Koi Aksariyat Aur Akliyat Ka Taqaza Nahi ,..
Balki Shariyat Me Tou Yeh Hai Ke?: “Daleel Kis Cheez Ki Hai ?” Allah Ki Kitaab Aur Uske Rasool(Sallallahu Alaihi Wasallam) Ki Sunnat Sabit Hai Tou Bus Wo Baat Durust Hai ,..
Aur Agar Sabit Nahi Tou Uss Baat Ko Chorr Dijiye Allah Ke Liye,.

To Be Continue …

     

Sunnat Ki Ahmiyat: Part-2

430 views

☆ Sunnat Ki Ahmiyat : Part-2
# Rasool’allah (Sallallahu Alaihi Wasallam) Ke Ba-asat Ka Maksad :
Rasool’Allah (Sallallahu Alaihi Wasallam) Ka Muamla Dusre Ambiya(Alaihi Salam) Se Mukhtaleef Hai ,..
Isliye Ke Aapka Paigaam Apki Ba’asat Se Lekar Qayamat Tak Hai,
Jabki Digar Ambiya (Alaihi Salam) Ka Paigaam Unke Zindagi Unke Hayat Ek Makhsus Wakt Tak Hua Karta Tha, Jab Tak Ke Dusra Nabi Na Aajaye ,..
Dusra Nabi Aata Tou Pahle Ki Shariyat Khatm Dusre Ki Laagu Ho Jati ,…

Lekin Kyun Ke Rasool’Allah (Sallallahu Alaihi Wasallam) Aakhri Nabi Hai ! Insaniyat Ki Taraf Aur Tamam Aalam Ki Taraf Bheje Gaye, Ab Aapke Baad Koi Nabi Nahi Aaney Wala Lihaja Aapki Ita-at Sirf Musalmano Par Hi Nahi Balki Tamam Insano Par Farz Aur Wajib Hai ,.. – @[156344474474186:]

* Aur Iski Wajahat Me Allah Rabbul Izzat Ne Quraan Me Farmaya –
♥ Al-Quraan: “Aye Rasool! Insaniyat Se Kehdo Ke Mai Tum Sabki Taraf Allah Ka Rasool Banakar Bheja Gaya Hu,.” - [Surah(7) Araf: Ayat-158]

Tou Rasool’Allah (Sallallahu Alaihay Wasallam) Insaniyat Ki Taraf Mabus Kiye Gaye,
Aur Insaniyat Ka Kaam Hai Ke Wo Rasool’Allah (Sallallahu Alaihay Wasallam) Ki Itteba Karey, Farmabardari Karey Aur Aap Par Imaan Laye, Aur Aapki Kitab Par Imaan Laye Aur Aapke Tareeke Par Chaley ,..

Tou Jab Insaniyat Ko Ye Hukm Aa Raha Hai Ke Rasool’Allah Ki Ita-at Karo, Tou Yaha Musalmano Par Tou Badh-Chadhkar Ye Baat Jyada Laagu Hoti Hai Kyunki Humne Imaan Ka Dawa Kiya Lihaja Humpar Ye Baat Jyada Wajib Hoti Hai …

# Sunnat Kya Hai ?
*Ab Sunnat Kya Hai ? Ye Jaan Lijiye Ke: Rasool’Allah (Sallallahu Alaihi Wasallam) Ka Qoul ,.. (Yaani Jo Aapne Kaha)
*Aap (Sallallahu Alaihi Wasallam) Ka Fail ,.. (Yaani Jo Aapne Kiya)
*Aur Aapki Takreer (Yaani Aapne Logon Ko Karte Hue Dekha Aur Khamoshi Ikhteyar Ki)
*Aur Aap (Sallallahu Alaihi Wasallam) Ke Akhlaaq-e-Mubarak,.. Aadab, Ausaaf, Aapki Seerat Ye Tamam Milakar Sunnat-e-Rasool Kehlati Hai ,..

Tou Jub Mai Jikr Karunga Sunnat! Jiska Aam Lugat Ka Matlab Hota Hai Tareeka ,…
Lekin Sharayi Istehla Me Matlab Hota Hai Rasool’Allah (Sallallahu Alaihi Wasallam) Ka Tareeka,..

Tou Nabi Ne Jo Kiya, Nabi Ne Jo Kaha! Ummat Ke Liye Wajib Aur Farz Hai Ke Usi Amal Ko Har Mu’amle Me Zindagi Ke Har Shobey Me Ikhtiyar Karey ,..
Tou Nabiyo Ke Bheje Janey Ka Maksad Hai Ke Unki Iata-at Aur Farmabardari Ki Jaye, Isliye Ke Rab Ne Unhe Munttakhib Kiya Hai Ke Hum Log Unki Baat Maney ,…

Aur Rasool’allah (Sallallahu Alaihi Wasallam) Kyunki Saare Aalam Ke Nabi Hai, Saare Aalam Ke Liye Bheje Gaye Hai Aur Rasool’allah (Sallallahu Alaihi Wasallam) Ko Hum Tamam Ke Liye Usma-Tun-Hasna (Misaal/Ideal aur Role Model) Banaya Gaya Hai ,..

Tou Rasool’allah (Sallallahu Alaihi Wasallam) Ke Ba-asat Ka Maksad Tha Ke Hum Unki Ita-at Kare, Itteba Kare, Aur Aap (Sallallahu Alaihi Wasallam) Ki Farmabardari Kare Jiske Talluk Se Quraan Ne Youn Farmaya Aur Kaha:
♥ Al-Quraan: (Tarjuma: Aye Musalmano ! Allah Ke Rasool (Sallallahu Alaihi Wasallam) Tumhare Liye Behtareen Namuna (Ideal Aur Role Model) Hai, Jo Iman Rakhta Hai Allah Par Aur Youme Aakhirat Par Aur Allah Ko Kasrat Se Yaad Karta Hai Tou Aise Shakhs Ke Liye Jaruri Hai Ke Allah Ki Aur Uske Rasool (Sallallahu Alaihi Wasallam) Ki Ita-at Kare Aur Rasool’Allah (Sallallahu Alaihi Wasallam) Ko Ideal Aur Role Model Maaney . – [Surah Ahzab (33): Ayat:21]

Ab Gour karte Hai Ke:
*Kya Wakay Me Aaj Hum Rasool’Allah (Sallallahu Alaihi Wasallam) Ko Apna Role Model Maan Rahe Hai ?
*Kya Wakay Me Aapke Ita-at Ke Mutabik Humari Zindagi Guzar Rahi Hai ?
*Kya Wakay Me Humari Zindagi Ke Tamam Shobo Me Rasool’Allah (Sallallahu Alaihi Wasallam) Ka Tareeka Chalkata Hai ?

Agar Ha ? Fir Muamla Bohot Acha Hai ,..
Aur Agar Naa? Fir Tou Mumla Jabardast Bigad Hai.. Usko Badalne Ki Jarurat Hai Aaj,…

To be Continue …