"the best of peoples, evolved for mankind" (Al-Quran 3:110)

⭐ Tawheed Aur Shirk Ki Haqeeqat ….

* * * * * {{{ TAWHEED }}} * * * * *

Tawheed Ka Matlab Hai “Ek” Janna Aur “Ek” Man’na. Tawheed Se Muraad Allah Ko Uski Zaat, Sifaat, Uski Ibadat Aur Uske Huqooq Me Munfarid, Yekta Aur Bemisaal Maan’na.
Quraan-o-Hadees Ki Roushni Me Tawheed Ki 3 Kisme Hai.
∗1. Tawheed’e’ruboo’biat,
∗2. Tawheed Asma’wa’sifaat,
∗3. Tawheed Ulu’hiat Ya Tawheed Al’ebaada.

»1. Tawheed’e’ruboo’biat: Se Muraad “Allah Ko Kayenat Ki Har Cheez Ka Khaliq, Malik, Raziq Aur Tamaam Umoor Ki Tadbeer Karnewala Man’na.”
♥ Al-Quraan: (Aye Nabi) Aap (In Mushrikeen Se) Poocho Ke Tumko Aasman Aur Zameen Me Rizq Koun Pahunchata Hai, Ya Tumhare Kaano Aur Aankho Ka Maalik Koun Hai Aur Jaandar Ko Bejaan Se Aur Bejaan Ko Jaandar Se Koun Nikalta Hai, Aur Tamaam Kaamo Ka Intezaam Koun Karta Hai, Wo Fauran Kahenge Ke (Ye Sub Kaam Karne Wala) Allah Hai. Tou Unsey Poocho Ke Phir Tum(Allah Se) Darte Kyon Nahi. – (Surah Yunus(10): Ayat-31).
Iss Ayate Mubarak Se Pata Chala Mushrikeen-e-Makka Tawheed’e’ruboo’biat Ko Mantey They. – @[156344474474186:]

»2. Tawheed Ulu’hiat: Se Muraad Ye Hai Ke Allah Hee Haqeeqi Aur Akela Mabood Hai. Yahi Wo Tawheed Hai Jisko Mushrikeen-e-Makka Samet Har Daur Ke Mushrik Maan’ne Se Inkaar Karte Rahe. Namaz, Roza, Haj, Qurbaani, Dua, Nazr Wa Niaz… Sirf Allah Ke Liye Ho.”
♥ Al-Quraan: Aur (Aye Logon!) Tumhara Mabood Tou Bus Ek Hee Hai, Uske Alawa Koyi Ibadat Ke Layaq Nahi, Wo Bahut Raham Karnewala Aur Meharbaan Hai”. – (Suah Al-Baqrah(2), Ayat-163)

»3. Tawheed Asma’sifaat: Se Muraad Ye Hai Ke Allah Ke Unn Sab Asma Aur Sifaat Ka Iqraar Kiya Jaye Jin Se Allah Ne Quran Me Apne Aap Ko Mousuf Kiya Ya Nabi (Sallallahu Alaihay Wasallam) Ne Aahadees Me Unka Zikr Kiya. Aur Allah Ke Asma Aur Sifat Me Kisi Ko Shareek Na Kiya Jaye.
Jaise Allah Rabbul Izzat Ne Farmaya:
♥ Al-Quraan: Aye Iblees Tujhe Usey Sajda Karne Se Kis Cheez Ne Roka Jisey Mai Ne Khad Apni Qudrat Se Paida Kiya. – (Surah Sad (38), Ayat-75)
♥ Al-Quraan: Rehmaan Arsh Par Qayim Hai. – (Surah Taha(20): Ayat-5),
♥ Al-Quraan: Allah Ne Musaa (Alaihay Salam) Se Qalaam Kiya. – (Surah An-Nisa(4), Ayat-164),
♥ Mafhoom-e-Hadees: Allah Aasmaani Duniya Par Nuzool Farmata Hai. – (Muslim:758),
Allah Ke Asma Wa Sifaat Ko Haqeeqat Par Mahmoul Karte Huye Kisi Qisam Ki Taweel, Kaifiat, Tateel Aur Tamseel Ke Bagair Emaan Lana Tawheed Asma Wa Sifaat Hai.

• Deen-e-Isalm Ki Dawat Ka Sahi Tarika – Ye Hai Ke Dawat Ka Aagaz Tawheed Se Kiya Jaye. Logo Par Tawheed Aur Shirk Ke Fark Ko Wazey Kiya Jaye.
♥ Mafhoom-e-Hadees: Rasool’Allah (Sallallahu Alaihay Wasallam) Ne Farmaya “Pahli Cheez Jis Ki Taraf Logon Ko Dawat Di Jaye Wo Kalma-e-Shahadat Hona Chahiye.” Yaani Ye Ke Log Allah Hi Ko Ilaah Waahid Maaney. – (Bukhari:1395, Muslim:19).

* * * * * {{{ SHIRK }}} * * * * *

Shirk Ka Logvi Maani Hota Hai Sharik Karna, Aur Sharai Aetbar Se Shareek Ka Matlab Hota Hai, Ke Allah Ta’ala Ki “Zaat” Ya Phir “Sifat” Me Kisi Ko Sharik Karna.
♥ Mafhoom-e-Hadees: “Subse Badaa Gunaah Ye Hai Ke Tu Allah Ke Saat Kisi Ko Shareek Karey Halan Ke Uss(Allah)ne Tujhe Paida Kiya.” – (Bukhari 4477, Muslim 86.)
♥ Al-Quraan: Allah Ke Saath Shirk Na Karna. Beshaq Shirk Badaa Bhari Zulm Hai. – (Surah Luqman(31): Ayat-13)
Lihaza Shirk Se Bachey Aur Tawheed Parast Baney.

• Shirk Ke Nuksaan
Shirk Jaise Kabira Gunaah Ke Anzam Ke Barey Me Quraan-e-Kareem Me Farmay Ki:
♥ Al-Quraan: “Jisney Allah Ke Sath Kisi Ko Shareek Tehraya, Allah Ne Uspar Jannat Haraam Kar Diya. Uska Thikhana Jahannum Hai Aur Zalimo Ka Koyi Madadgar Na Hoga.” – (Surah Al-Maida(5): Ayat-72)
♥ Mafhoom-e-Hadees: “Jo Koyi Iss Haal Me Marey Ke Wo Allah Ke Siwa Kisi Aur Ko Pukaarta Ho Tou Wo Jahannum Me Dakhil Hoga.” – (Bukhari 4497, Muslim 92).

• Shirk Karne Wale Ko Uske Nek Aamal Faida Nahi Denge
Nek Aamal (Jaise Sadqa, Khairat, Namaz, Roza,…) Aqeede Shirk Ki Moujoodgi Me Bekaar Ho Jate Hai Aur Allah Ke Yaha Qabil Qabool Nahi Rehte. Chunache Allah Ne 18 Jaleel-ul-Qadar Ambiya(Alaihay Salam) Ka Naam Leney Ke Baad Farmaya:
♥ Al-Quraan: “Aur Agar Unn Logon Ne Shirk Kiya Hota Tou Unkey Bhi Sub Aamal Zaya Ho Jatey”.- (Surah Al-An’am(6): Ayat-88)

• La’ilaaha’illAllah Muhammadur RasoolAllah Padh Ne Wala Bhi Mushrik Ho Sakta Hai ?
♥ Mafhoom-e-Hadees: Rasool’Allah (Sallallahu Alaihay Wasallam) Ne Farmaya: “Tum Yaqeenan Apne Se Pehli Ummato Ki Pairwi Karoge, Aur Pehli Ummato Se Aapki Muraad Yahood Wa Nasara Hai”. – (Bukhari.3456, Muslim.2669)
“Kya Tu Ne Unhe Nahi Dekha Jinhe Kitab Ka Kuch Hissa Mila Hai Ke Wo Boot Aur Tagoot Par Emaan Laate Hai”. – (Surah An-Nisa(4): Ayat-51)
♥ Mafhoom-e-Hadees: Rasool’Allah (Sallallahu Alaihay Wasallam) Ne Kaha: “Qayamat Uss Waqt Tak Qayam Na Hogi Jab Tak Meri Ummat Ki Ek Jamaat Mushriko Se Na Jaa Miley Aur Meri Ummat Ke Bahut Se Log Boot Parasti Na Karey”. – (Tirmizi 2219)

• Jab Kisi Qabar Ki Ibadat Ho Tou Usko Boot-Parasti Kaha Jayega
♥ Mafhoom-e-Hadees: Rasool’Allah (Sallallahu Alaihay Wasallam) Ne Farmaya:
“Aye Allah! Meri Qabar Ko Boot Na Banana Jiski Ibadat Ki Jayey. Allah Ka Uss Qaum Par Sakht Gazab Nazil Hota Hai Jo Apne Nabiyo Ki Qabaro Ko Ibadat-Gaah Bana Letey Hai”. – (Muwatta Imaam Malik 9:88)

♥ Mafhoom-e-Hadees: Maa Aisha (RaziAllahu Anhu) Farmati Hai Ke Rasool’Allah (Sallallahu Alaihay Wasallam) Ne Aakhri Waqt Me Farmaya:
“Yahood Wa Nasara Par Allah Ki Laanat Ho, Unhone Apne Ambiya Ki Qabro Ko SajdaGaah Bana Liya”. Agar Iss Baat Ka Khouf Na Hota Ke (Sallallahu Alaihay Wasallam) Ki Qabar Ko Bhi Sajda Gaah Bana Liya Jayega Tou Aap Ko Band Hijrey Me Dafan Na Kiya Jata Aur Aap Ki Bhi Qabar Khuli Hoti. – (Bukhari.1390, Muslim.529)

Muashre Me Shirk Failne Ki Ek Aham Waja Ye Hai Ke Shaitan Awliya Allah Se Muhabbat Ko Aad Banakar Guloo Karwata Hai.
Qaum Nooh Ko Dekhiye –
♥ Mafhoom-e-Hadees: “Wadd, Suwa, Ghutaif, Yauq, Nasr Noah Ki Qaum Ke Swaleheen The Jin Ki Logon Ne Baadme Parashtish Shuru Kardi”. – (Bukhari 6:442)
♥ Al-Quraan: “Aur Unhone Kaha Ke Tum Apne Maboodo Ko Hargiz Na Cho’dna Aur Wadd, Suwa, Ghutaif, Yauq, Nasr Ko Kabhi Na Cho’dna”. – (Surah Nooh(71): Ayat-23)

• Mushrikeen Makka Gairullaah Ki Ebadat Kyon Kiya Karte?
Allah Iska Jawab Quraan Me Deta Hai:
“Hum(Mushrik) Unki Ibadat Sirf Isliye Karte Hai Ke Wo Allah Ki Nazdeeki Ke Martabe Tak Humari Rasayi Karade”. – (Quran Sura Zumar(39): Ayat-3)
Yaani Mushrikeen-e-Makka Gairullaah Ko Apna Sifarishi Aur Allah Ke Qareeb Ka Zariya Samajhte They.
♥ Al-Quraan: “Wo Kehte Hai Ke Ye Allah Ke Paas Humare Sifarishi Hai”. – (Surah Yunus(10): Ayat-18)
♥ Mafhoom-e-Hadees: Aap (Sallallahu Alaihay Wasallam) Farmate Hai – “Ye Aise Log Hai Jab Inme Se Koi Nek Banda Mar Jata Tou Uski Qabar Par Sajda Gaah Bana Dete Hai Aur Tasveere Bana Dete Hai. Ye Allah Ke Nazdeek Badtareen Maqlooq Hai”. – (Bukhari.427, Muslim.528)
Kya Aaj Nek Logon Ki Qabro Ko Aisa He Nahi Karte? Isiliye Quraan Mey Allah Farmata Hai,
♥ Al-Quraan: “Beshaq Tum Allah Ke Siwa Jin Ko Pukaarte Ho Wo Tum Jaise Bandey Hee Hai”. – (Surah Al’aaraf(7): Ayat-194)
Jin Awlia Allah Ko Mushrikeen Pukarte They Unke Barey Me Bataya:
♥ Al-Quraan: “Murde Hai, Zinda Nahi! Unko Ye Bhi Maloom Nahi Ke Ye Kab Uthaye Jayenge”. – (Surah An-Nahl(16): Ayat-21)
♥ Al-Quraan: “Aur Jab (Qayamat Ke Din) Log Jama Kiye Jayenge Wo Unkey Dushman Ho Jayenge Aur Unki Ibadat Ka Inkar Kar Denge. – (Al-Ahqaf(46): Ayat-6)
Allah Ki Zaat Me Shirk Ka Mafhoom Ye Hai Ki –
♥ Al-Quraan: “Na Us’sey Koyi Paida Huwa Naahi Wo Kisi Se Paida Huwa” – (Surah Ikhlas(112): Ayat-3)
“Yaqeenan Wo Kafir Hai Jo Kehte Hai Ke Isa Ibne Mariyam Hee Allah Hai”. – (Surah Al-Ma’ida(5): Ayat-72)
Aur Unhone Uskey Baaz Bando Ko Uska Juzz Tehraa Diya. Beshak(Aisa) Insan Khullam Khulla Na Shukra Hai”. – (Surah Az-Zukhruf(43): Ayat-15)

» Sabaq: Lihaza Hum Sab Par Lazim Hai Ke Deen Ka Buniyadi Aur Sahee Aqeeda Quraan Aur Hadees Ke Roshni Me Janey Aur Usi Paigam-e-Haq Ki Pairwi Kare, Kitabo Sunnat Ke Sahibe Ilm Se Apni Aur Auro Ki Islaah Karte Rahe, Saheee Ilm-e-Deen Hasil Karey Taaki Har Kism Ki Gumrahi Se Khud Bhi Bach Sakey Aur Auro Ko Bhi Bachane Ki Koshish Ki Jaye.. !!! Wa Akhiru Dawana Anilhamdulillahe Rabbil A’lameen !!!
Allah Taala Hume Parhne Sun’ne Se Jyada Amal Ki Taufiq De.. Ameen !!!

You might also like

Leave a Reply

Be the First to Comment!

avatar
wpDiscuz