Hadees Graphics [ ummat e nabi ] 6-3-13-1

Hazrate Abu Bakr (RaziAllahu Anhu) ….

♥ Sahaba-e-Kiram Hazrat Abu Bakr Siddeeq (RaziAllahu Anhu) Ki Zindagi Aur Martaba ♥

# Laqab: Siddeeqe Akbar, Gaare Yaare Nabi, Afzalun Naas Ba’adal Ambiya, Saani Isnain, Khalifatul-Rasool, Ateeq.

# Wiladat:
– Aap Ki Wiladat Mubarak 573 C.A. Me Makka Me Hui. Aap Ke Waalid Ka Naam Usman Abu Quhafa Ibn Amir Aur Waalida Ka Naam Salma Bint Sakhar (Ummul Khair) Hai.
– Aap Quraish Ke Banu Taym Kabeele Se Ta’aaluq Rakhte Hain. Aap Ka Asl Naam Abdullah Hai.

# Deen Ki Daawat :
Aap Ki Daawat Aur Mashware Se Bahut Saare Log Islam Me Dakhil Hue, Jin Me Hazrat Usman-Ibn-Affan, Zubair-Ibn-Awwam, Talha-Ibn-Ubaidullah, Abdur-Rehman-Bin-Awf, Sa’ad-Ibn-Abi-Waqqas, Abu-Ubaidah-Ibn-Jarrah, Abdullah-Bin-Abdul-Asad (Abu Salama), Khalid-Ibn-Sa’id Aur Abu-Huzifah-Ibn-Mughirah (Razi’Allahu Anhuma) Mashhoor Hain.
– Aap Ne 8 Gulamo Ko Aazad Karaya Jo Musalman Ho Gaye They. Jin Me Mardo Me Hazrate Bilal-Habashi-Ibn-Ribah, Abu-Fakih, Ammar-Ibn-Yasir Aur Abu-Fuhaira Aur Aurto Me Lubainah, Nahdiah, Umm Ubais, Harisah Bint Muammil Shamil Hain. Is Ke Liye Aap Ne 40,000 Dinar Kharch Kiye.
– Aap Ke Waalid Ne Kaha ‘Tum Budhe Aur Kamzor Gulamo Ko Aazad Karate Ho Jis Se Hame Koi Faida Nahi Hoga.’
– Aap Ne Farmaya ‘Main Tou Allah Ki Raza Ke Liye Musalmano Ko Aazad Karata Hu.’

# Siddeeqe Akbar Ka Laqab :
12 Nabawi (621 C.A.) Me Me’araj Ke Baad Huzoor (Sallallahu Alaihay Wasallam) Ashaba Ko Me’araj Ki Baaten Bayan Kar Rahe They.
– Hazrate Abu Baqr (Razi’Allahu Anhu) Thoda Der Se Aaye.
– Aap Aakar Huzoor (Sallallahu Alaihay Wasallam) Ke Qareeb Jaakar Bethe.
– Huzoor (Sallallahu Alaihay Wasallam) Ne Phir Se Shuru Se Pura Bayan Shuru Kiya.
– Aur Hazrate Abu Baqr (Razi’Allahu Anhu) Har Baat Par Farmate ‘Sadaqata Ya Rasool’Allah (Sallallahu Alaihay Wasallam).’
*Huzoor (Sallallahu Alaihay Wasallam) Ne Khush Hokar Aap Ko ‘Siddeeqe Akbar’ Ka Laqab Ata Farmaya Yaa’ni Tamam Siddeeq Me Sab Se Bada. – @[156344474474186:]

# Aap Ke Baare Me Huzoor Ka Farman :
– Aap Ke Baare Me Pyare Aaqa (Sallallahu Alaihay Wasallam) Farmate Hain Ke,
(1) Abu Bakr ‘Afzalul Bashar Ba’adal Ambiya’ Hain Ya’ni ‘Ambiya Ke Baad Tamaam Insan Me Sab Se Afzal.’
(2) Agar Abu Bakr Ka Emaan Meri Tamam Ummat Ke Emaan Ke Saath Wazan Me Kiya Jaaye Tou Abu Bakr Ka Emaan Gaalib Aaye.
(3) Hazrate Abu Bakr Ka Ye Martaba Sirf Uski Ibadaat Ki Wajah Se Nahi Hai, Balke Allah Ta’ala Ne Uske Dil Me Jo Khas Rakha Hai Uski Wajah Se Hai.
(4) Abu Bakr Ke Mujh Par Bahut Ehsaan Hain. Uss Ne Islam Ke Liye Apni Jaan Aur Maal Bhi Qurban Kiye Hain Aur Apni Beti Mere Nikah Me Di Hai Aur Abu Bakr Ne Hazrat Bilal Habsi Ko Aazad Karaya Hai.’

# Aap Ashra-e-Mubashara Me Se Hain. :
(1) Ek Baar Huzoor (Sallallahu Alaihay Wasallam) Ne Aap Se Farmaya ‘Abu Baqr, Jannat Me Dakhil Hone Walo Me Tum Sab Se Pehle Rahoge.’
(2) Ek Baar Huzoor (Sallallahu Alaihay Wasallam) Ne Farmaya ‘Jab Allah Ta’ala Kisi Mo’min Ke Liye Bhalai Ka Irada Karta Hai To Uss Me Koi Khaslat Paida Farmata Hai Jis Ke Sabab Wo Jannati Ban Jaata Hai Aur Aisi 360 Khaslate Hain.’ Hazrate Abu Baqr Ne Puchha ‘Ya Rasool Allah (Sallallahu Alaihay Wasallam), Kya Mujh Me Aisi Koi Khaslat Hai?’ Huzoor (Sallallahu Alaihay Wasallam) Ne Farmaya – ‘Abu Baqr, Tumhe Mubarak Ho Ke Tum Me Wo Tamam Khaslat Maujood Hai.’

# Ameerul Hujjaj :
9 Hijri Me Jab Hajj Farz Hua To Huzoor (Sallallahu Alaihay Wasallam) Ne Aap Ko Ameerul Hujjaj Banakar Ashaba Ko Aap Ke Saath Hajj Ke Liye Bheja.

# Aap Ki Mohabbat Nabi-e-Paak Ke Liye :
10 Hijri Me Hajjatul Wida Ke Mauqe Par Bhi Rasool’Allah (Sallallahu Alaihay Wasallam) Ke Saath Rahe. Jab Ye Aayat Naazil Hui ‘Aaj Ke Din Ham Ne Tumhare Liye Tumhara Deen Mukammal Kar Diya Aur Tumhare Liye Deene Islam Pasand Kiya.’ Tou Ashaba Khush Hue Ke Allah Ta’ala Ne Deene Islam Ko Mukammal Kar Diya. Magar Aap Gamzada Ho Gaye. Jab Puchha Gaya Tou Farmaya Ke ‘Ye Sahi Hai Ke Deene Islam Ko Allah Ta’ala Ne Mukammal Kar Diya Hai. Magar Deen Mukammal Hone Ke Baad Mumkin Hai Ke Huzoor (Sallallahu Alaihay Wasallam) Ham Se Anqareeb Parda(Rukhsat/Wafat) Farmayenge. Main Ye Sochkar Gamzada Hu.’

*Huzoor (Sallallahu Alaihay Wasallam) Ke Wafat Ke Baad Sab Ashaba Gamzada They Aur Hazrate Umar Farooq (Razi’Allahu Anhu) Ne Tou Farma Diya Tha Ke – ‘Agar Kisi Ne Mere Saamne Ye Kaha Ke Huzoor (Sallallahu Alaihay Wasallam) Ka Inteqal Ho Gaya Hai Aur Aap (Sallallahu Alaihay Wasallam) Hamare Darmiyan Me Nahi Hain Tou Mai Talwar Se Uski Gardan Kalam Kar Dunga.’
– Aise Maahol Me Sab Khamosh They Tab Hazrate Abu Baqr Uthkar Aage Aaye Aur Khutba Padhney Ke Baad Ashaba Se Farmaya: ‘Agar Koi Muhmmad (Sallallahu Alaihay Wasallam) Ki Parastish Karta Ho Tou Wo Jaan Jaaye Ke Huzoor (Sallallahu Alaihay Wasallam) Inteqal Kar Gaye Hain
Aur Jo Rabbe Muhammad (Yaani Allah) Ki Ibadat Karta Ho Tou Wo Jaan Le Ke Allah Zinda Hai Aur Kabhi Marne Wala Nahi.’

# Aap Islam Ke Pahle Khaifa Rahe :
– Huzoor (Sallallahu Alaihay Wasallam) Ke Parda Farmane Ke Baad Hazrate Umar Farooq (Razi’Allahu Anhu) Ke Mashware Par Aap Ko Khalifa Banaya Gaya.
– Aap 13 Rabi-Ul-Awwal 11 Hijri (8 June 632 C.A.) Ko Sab Se Pehle Khalifa Hue.
– Aap Ka Daure Khilafat 2 Saal 4 Maah Ka Raha.

# Quraan-e-Kareem Ki Hifazat :
11 Hijri (632 C.A.) Me Jange Yamama Me Taqreeban 70 Ashaba Shaheed Hue Jo Haafize Qur’an They. Hazrate Umar Farooq (Razi’Allahu Anhu) Ne Aap Se Farmaya ‘Iss Tarah Haafize Qur’an Kum Hote Rahe To Qur’an Ki Hifazat Karna Mushkil Hoga. Behtar Hai Ke Ham Qur’an Ko Jama Karke Kitaab Bana Len.’
– Iss Tarah Hazrate Umar Farooq (RaziAllahu Anhu) Ke Mashware Se Qur’an Majeed Ko Jama Karke Kitaab Banane Ka Kaam Shuru Kiya Gaya, Jo Hazrate Usman Ghani Ke Zamane Me Mukammal Hua.

# Aapka Pariwar : Aap Ki 4 Biwiya, 3 Bete Aur 3 Betiya Hain.
(1) Qutaylah Bint Abd-Al-Uzza Se 1 Beta –Abdullah Aur 1 Beti – Asma
(2) Umme Rumman Se 1 Bata – Abdur Rehman Aur 1 Beti – Aaisha
(3) Asma Bint Umays Se 1 Beta – Muhammad
(4) Habibah Bint Kharijah Se 1 Beti – Umme Kulsum
» Sirf Aap Hi Aise Sahabi Hain Jinke Waliden Aur Aulaad Bhi Ashaba Hain.

# Aap Nabi-e-Paak Ke Sabse Qareebi Dost Hai:
– Aap ‘Gare Yaare Nabi’ Hain Yaani Nabi-e-Paak (Sallallahu Alaihay Wasallam) Ke Sab Se Qareebi Dost.
– Aap Ko Huzoor (Sallallahu Alaihay Wasallam) Ne Har Khaas Mauqe Par Aur Mehfil Me Saath Aur Qareeb Rakha.
– Hijrat Me Bhi Pyare Aaqa (Sallallahu Alaihay Wasallam) Ne Sirf Aap Ko Saath Liya.

# Wisaal:
Aap Ka Wisaal 22 Jamaadil Aakhir 13 Hijri 23 August 634 C.A. Ko 63 Baras Ki Umr Me Madina Me Hua. Aap Ki Namaze Janaza Hazrat Umar Farooq (RaziAllah Anhu) Ne Padhai. Aap Ko Roza-e-Rasool Me Huzoor (Sallallahu Alaihay Wasallam) Ke Bagal Me Dafn Kiya Gaya Hai.

♥ Allah Rabbul Izzat Se Dua Hai Ke
# Allah Hum Tamam Ko Hidayat Ata Farmaye ,..
# Hume Sirate Mustakim Par Chalaye ,…
# Jab Tak Hume Zinda Rakhey Islam Aur Imaan Par Zinda Rakhye…
# Khatma Humara Imaan Par Ho …
!!! Wa Akhiru Dawana Anilhamdulillahe Rabbil A’lameen !!!
• Ummat-e-Nabi.com

• Note: Likhne Me Koi Khata Hui Ho Tou Jarur Ba-Daleel Hamari Islah Kare… !!!!
Dua Ki Darkhwast !!!!

Views: 19141

Leave a Reply

6 Comments on "Hazrate Abu Bakr (RaziAllahu Anhu) …."

Notify of
avatar

Sort by:   newest | oldest | most voted
MD TANVIR ALAM
Guest
2 years 7 months ago

ALHUMDOLILLAH
SUBHANALLAH
JAZAKALLAHKHAIR

mohammed hasan khan
Guest
mohammed hasan khan
1 year 8 months ago

Jakaz allah khair

sakirkhan
Guest
sakirkhan
1 year 6 months ago

subhan allah

mohammad abdul asif khan
Guest
mohammad abdul asif khan
1 year 3 months ago

subhan allah

mukhtar sayyed
Guest
mukhtar sayyed
1 year 3 months ago

Masha Allah post he bhai

Arif
Guest
Arif
3 months 2 days ago

آمین

ماشاء اللّٰہ

wpDiscuz