ashabulukhdud

⭐ Ashabe Ukhdood – Sabr Aur Aazmaish Ka Ibratnaak Waqiya …


“Sabr Aur Aazmaish Ka Ek Waqiya Jo Bacche, Bhudey, Aurate, TijaratDaar Sabke Liye Ibrat Hai Iss Waqiye Me, Yah Waqiya Bohot Bada Hai, Muslim Sharif Ki Riwayat Hai Taweel Hai, Hum In’sha’Allah Iss Waqiye Ko Ikhtesar Se Bayan Karne Ki Koshish Kar Rahe Hai..”

♥ Mahfum-e-Hadees: Aap (Sallallahu Alaihay Wasallam) Farmate Hai aur Iss Waqiye Ko Allah Rabbul Izzat Ne Quraan Me Surah-Tul-Burud (85) Ke Ibtedayi Ayato Me Bayan Kiya Hai “Ashabe Ukhdood” Ka Waqiya.
Farmaya “Qkhutubil Ashabi Ukhdood (Maar Diye Gaye Gaddhe Wale Log)

*Sahaab-e-Kiram Ne Rasool’Allah Se Pucha Ke Ukhdood Ka Waqiya Kya Hai? Yeh Gaddhe Wale Log Koun They?
Aap (Sallallahu Alaihay Wasallam) Ne Farmaya –
“Tum Se Pahle Bani-Israyil Me Ek Qoum Thi. Uss Basti Me Ek Baadshah Tha. Aur Uss Baadshah Ke Paas Ek Jaadugar Tha. Wo Jaadugar Jaise Jaise Jayif(Budha) Hone Laga Waise Usne Baadshah Se Kaha, Ke – “Aye Badshah ! Mai Ab Budha Ho Chuka Hu Aur Mai Anakrib Marr Jaunga. Lihaza Tum Apni Basti Se Ek Noujawan Baccha Mukarrar Karo Jisey Mai Apna Jaadu Wirasat Me Usey Sikha Du Taaki Mere Baad Wo Aapki Madad Karta Rahe.
Badshah Ne Apni Qoum Se Ek Baccha Chun Liya.

# Bacche Ka Raahib Se Ilm Sikhna
Ab Wo Baccha Jab Jaadu Ka Ilm Sikhne Apni Basti Se Mehal Ki Taraf Jata Tab Usey Raste Me Ek Deendar Raahib (Tauhid Parast) Se Mulaqat Hui. Jo Ki Badshah Ke Zulm Ke Wajah Se Basti Me Nahi Rehta Tha. Kyunki Woh Badshah (Nauzubillah) Khudko Rab Kehlata Tha.
Wo Raahib Uss Bacche Ko Deen Ki Baate Batata Khamoshi Me. Wo Baccha Wo Baate Sikhkar Mehal Jata, Jaadugar Se Jaadu Ka Ilm Sikhta. Aur Wapas Ghar Jata..
Yunhi Har Roz Hota Raha.. Ab Baccha Jo Jo Uss Raahib Ke Paas Baithkar Ilm Sikhne Laga Tou Usey Der Honey Lagi. Aur Jab Wo Der Se Mehal Pohochta Tou Usey Jaadugar Saza Deta Aur Puchta Ke Tu Der Se Kyun Aaya?

Usney Yeh Baat Raahib Se Kahi. – “Aye Raahib Jab Mai Tumhare Paas Baithta Hu Tau Jaadugar Ke Paas Pohchne Me Deri Hoti Hai Isiliye Jaadugar Marta Hai Aur Jab Ghar Der Se Jata Hu Tou Gharwale Marte Hai. Mai Kya Karu ?”

*Uss Raahib Ne Kaha – “Dekho Jab Tum Jaadugar Ke Paas Jao Tou Kaho Gharwalo Ne Der Se Chorra Taaki Tum Sharayi Ilm Sikho Mujhse, Aur Jab Ghar Der Se Pohcho Tou Unhe Kaho Jaadugar Ne Der Kardi. Aur Mujhse Tum Ilm Sikhte Rehna.
– Wo Naujawan Bacha Jaheen Tha Dono Se Ilm Sikhta Raha.

*Ek Martaba Hua Yun Ke Jab Wo Apne Basti Se Nikalke Ghar Jane Laga Tou Raste Me Ek Badaa Sa Jaanwar Tha Jisne Basti Ka Rasta Roke Rakha Aur Udhar Ke Log Udhar Janib Aur Idhar Ke Log Idhar Janib Khade They.
– Iss Bacche Ne Niyat Ki Aur Aage Badha, Jab Jaanwar Ko Dekho Tou Uss Bacche Ne Ek Patthar Uthaya Aur Niyat Ki – “Aye Allah! Agar Wo Jaadugar Haq Per Hai Tou Jab Mai Yeh Pathar Maaru Iss Jaanwar Ko Tou Yeh Janwar Na Marey. Aur Agar Wo Raahib Haq Par Hai Jo Mujhe Deen Ka Ilm Sikhata Hai Tou Jab Yeh Patthar Mai Iss Jaanwar Ko Maaru Tou Yeh Raste Se Hatt Jaye, Marr Jaye”.

Iss Niyat Se Usne Patthar Mara Aur Wo Jaanwar Marr Gaya. Aur Raste Se Hataa Diya Gaya. Bacche Ka Charcha Charo Taraf Ho Gaya.
Jab Yeh Baat Bacche Ne Uss Raahib Ko Sunayi Tou Raahib Ne Kaha – “Ab Tum Kaamil Ho Chuke Ho Emaan Ke Aitbar Se. Tumne Mujhse Deen Ka Ilm Sikh Liya. Ab Tumhare Paas Ilm Aa Gaya Hai Ab Ek Baat Jarur Yaad Rakhna. (Kyunki Wo Deendar Tha Usey Ilm Tha) Uss Raahib Ne Kaha Mera Naam Kisiko Mat Batana Ke Maine Tumhe Yeh Ilm Sikhaya Hai. (Kyunki Usey Pata Tha Ab Musibat Shuru, Aazmaiyish Shuru).

*Ab Huaa Yun Ke Allah Rabbul Izzat Ne Uski Duaao Me Tasir De Di. Koi Shakhs Uske Paas Aata Tou Baccha Kehta Ke Allah Par Emaan Lao, Aur Fir Uske Haq Me Dua Karta, Allah Uski Dua Ko Qubool Farmata Aur Wo Bimaaro Ko Shifaa Dene Laga Allah Ke Hukm Se. Jo Bhi Aata Usey Kehta Emaan Lao Allah Par Aur Wo Dua Karta Aur Wo Shafaa Yaab (Kamiyab) Hotey.

# Naujawan Bacche Par Baadshah Ke Wazeer Ka Emaan Laana
Ek Martaba Yun Hua Ke Ek Wazeer Tha Jo Uss Badshah Ke Mahal Me Tha Wo Nabina (Andha/Blind) Tha, Kisine Kaha Ke Jao Uss Bache Ke Paas Wo Bohot Maahir Ho Chuka Hai. (Logon Ko Laga Usney Jaadugar Se Yeh Llm Sikha.) Wo Jiske Liye Dua Karta Hai Uski Dua Qabool Hoti Hai, Tum Nabina(Blind) Ho Uss Se Jakar Nazar (Vision) Mango. Wo Shakhs Wazeer Bohot Sarey Tohfo(Gifts) Ke Sath Uss Bacche Ke Paas Pohoch Gaya Aur Uss Bacche Se Binayi(Aankho) Ki Fariyad Karne Laga.

*Uss Bacche Ne Kaha – “Binayi Mai Nahi Deta, Woh Tou Allah Deta Hai Shaffa.
*Wazeer Ne Kaha – “Yeh Allah Koun Hai ?”
*Bacche Ne Kaha Ke – “Yeh Mera Aur Tumhara Rab Hai Lihaza Tum Uspar Pahle Emaan Lao Fir Mai Dua Karunga.”
Wo Shakhs Wazeer Emaan Laya. Bacche Ne Uske Haq Me Dua Ki, Wazeer Ko Aankhe Aa Gayi.

# Bacche Ke Emaan Ki Khabar Baadshah Ko Pata Chali
Ab Wazeer Ki Aankho Ki Binayi Ka Wakiya Jab Badshah Ko Maloom Hua Tou Usne Uss Noujawan Bache Ko Hirasat Me Le Liya Aur Uss Bacche Se Pucha Ke – “Tum Mujhse Bhi Hatkar Kisi Aur Ko Rab Mante Ho ?”

Bacche Ne Kaha Ke – “Haa Wo Allah! Jo Mera Bhi Rab Hai Aur Tumhara Bhi”.
Baadshah Ne Kaha Ke – “Yeh Nahi Ho Sakta ! Kisne Tumhe Yeh Ilm Sikhaya?”
Uss Par Zulm Kiye Gaye Usey Jarb Lagaye Gaye(Maara Pita Gaya) Aur Fir Mazburan Uss Noujawan Bacche Ne Apna Mooh Khol Diya Aur Uss Raahib Ke Bare Me Bata Diya. Baadshah Ne Raahib Ko Giraftar Karke Apne Mehal Me Hazir Kiya.

Ab Mehal Me Wazeer Bhi Khada Hai, Raahib Bhi Aur Baccha Bhi..
Baadshah Ne Kaha – “Kya Tum Mujh Par Emaan Laatey Aur Allah Par Se Emaan Chorte Ho ?”
Unn Teeno Ne Kaha – “Ke Nahi! Hum Tou Sirf Allah Hi Par Emaan Laatey Hai.”
Fir Sabse Pahle Uss Raahib Se Pucha Gaya – “Kya Allah Par Emaan Chorte Ho ?”
Rahib Ne Kaha – “Nahi !”
Ek Aara Mangwaya Gaya, Uss Raahib Ke Sir Par Rakha Gaya Aur Dubara Pucha Ke – “Kya Allah Par Emaan Chorte Ho ? Mujhe Rab Mantey Ho ?”
Raahib Ne Iss Baar Bhi Uska Inkar Kiya.
Badshah Ne Woh Aara Chalwane Ka Hukm Diya. Aur Bhare Mehal Me Uss Raahib Ke 2 Tukde Kar Diye Gaye..

Fir Uss Wazeer Se Pucha Gaya – “Kya Tum Allah Par Emaan Chorte Ho ? Aur Mujh Par Emaan Laatey Ho ?”
Wazeer Ne Bhi Baadshah Ka Inkar Kiya. Aur Wazeer Ke Bhi 2 Tukde Kar Diye Gaye..
Ab Uss Bacche Se Pucha Gaya – “Kya Abhi Bhi Emaan Latey Ho Allah Par ?”
Uss Noujawan Bacche Ne Kaha – “Ha!”
Baadshah Ne Kaha – “Tujhe Mai Ibratnaak Saza Dunga.”

# Bacche Ke Rab (Allah) Par Puri Ki Puri Qoum Ka Emaan Le Aana
Badshah Ne Sipaiyon Ko Hukm Diya Ke Iss Bacche Ko Le Jao Pahaad Par Aur Waha Se Isey Niche Phenko Taaki Duniya Dekhe Aur Ibrat Hasil Kare Iss Se.
– Jab Bacche Ko Pahaad Par Le Jaya Gaya. Bacche Ne Allah Se Dua Ki – “Aye Allah Meri Hifazat Kar Inse”.
Fouran Ek Zalzala Aaya. Aur Uske Sath Tamaam Jo Fouji They Sab Halaaq Ho Gaye, Aur Baccha Sahi Salamat Mahal Pohoch Ke Baadshah Ke Aage Hazir Hua Aur Kehne Laga.. “Aye Baadshah ! Tum Mujhe Nahi Maar Sakte, Mere Rab Ne Mujhe Bacha Liya..”
Baadshah Ne Kaha – “Accha ! Ab Dusri Sazaa Tujhe.” Apne Sipayion Se Kaha Ke – “Isey Paani Me Le Jao Samandar Ke Bich Me Duba Dena”. Lekin Yeh Jarur Puch Lena Ke, Kya Mujh(Baadshah) Par Emaan Laatey Ho Yaa Nahi.. Eman Laata Hai Tou Chorr Do Aur Nahi Tou Paani Me Dubaa Dena.

Jab Usey Bich Samandar Le Gaye, Uss Bacche Ne Firse Allah Se Dua Ki – “Aye Allah! Meri Hifazat Kar Inn Zalimo Se”
Allah Ke Hukm Se Hawa Ne Rukh Badla Aur Tufaan Ki Shakl Me Unn Zalimo Ko Samadar Me Duba Diya Aur Uss Bache Ko Mehfuz Satah Par Le Aaya..
Baccha Fir Wapas Mehal Lautkar Baadshah Ke Samne Pesh Hua Aur Kehne Laga – “Aye Baadshah ! Tum Mujhe Nahi Maar Sakte. Ek Hee Tarika Hai Jis Tarike Se Tum Mujhe Qatl Kar Sakte Ho.”
Pucha Gaya – “Wo Kya Tareeka Hai ?”
Bacche Ne Kaha – “Mujhe Sabse Unche Muqaam Par Le Jao Apne Ilaqe Ke Aur Tamam Apne Basti Walo, Shehar Waalo Ko Jama Karo Uss Muqaam Par, Aur Unke Samne Meri Tarkaz Se Ek Teer Nikalo Jo Mai Dunga Tumhe Aur Uss Teer Ko Lekar Yeh Kehna – “Bismillahi Rabbil Ghulam (Ke Allah Ke Naam Se Jo Is Ghulam Ladke Ka Rab Hai)” Aur Fir Wo Teer Mere Sir Par Maarna, Tou Hee Mai Mar Sakta Hu..

Baadshah Ne Kaha – “Mai Tou Chahta Hu”… Usne Munadi Lagayi, Log Jamaa Hue, Ek Pahaad Par Uss Bacche Ko Le Jaaya Gaya Jaha Par Log Dekh Sakte They. Fir Baadshah Ne Uske Tarkaz Me Se Ek Teer Liya Aur Wohi Labz Kahe.
“Bismillahi Rabbil Ghulam (Ke Allah Ke Naam Se Jo Iss Gulaam Ladke Ka Rab Hai)”
Woh Teer Jaakar Uss Bacche Ke Sir Par Laga Aur Wohi Wo Ladka Shaheed Ho Gaya.
Ab Jaise Hi Wo Ladka Shaheed Ho Gaya Puri Ki Puri Awaam Jo Khadi Thi Wo Chilla Uthi – “Aamantu-Bi-Rabbil-Ghulam” (Hum Emaan Laye Uss Ladke Ke Rab Par) [Subhanallah]

# Allah Par Emaan Laney Wale Qaum Ko Aag Ke Gaddho Me Zinda Jalane Ki Sazaa
Jo Ki Ladka Haq Par Tha, Usney Sabr Kiya, Usey Pata Tha Agar Mai Jiunga Tou Dawat Itni Lambi Nahi De Paunga!
Usko Allah Ne Hikmat Bakshi, Uski Mout Ne Purey Ke Purey Mulk Ko Emaan La Diya.

Ab Wazeero Ne Kaha – “Yeh Tou Pahle Hi Hum 2-3 Logon Se Pareshan They Ab Tou Poori Basti Emaan Le Aayi. Ab Kya Kare ? Kuch Na Kuch Tou Hal Nikalna Hoga”.
Baadshah Ne Kaha – ‘Thik Hai!” Mashwara Hua, Aur Tay Kiya Gaya Ke Bade-Bade Gaddhe (Ukhdood/Pit) Khodey Jayenge, Gaddho Me Aag Lagayi Jayengi. Basti Ke Logon Ko Laya Jayega Aur Har Ek Se Sawal Kiya Jayega Ke Kispar Emaan Latey Ho? Allah Par Ya Badshah Par?
Jo Kahe Allah Par Tou Phenk Do Jalte Hue Aag Ke Gaddho Me Aur Jo Kahe Badshah Par Tou Chorr Do”.
Ab Basti Ke Tamaam Logon Ko Jamaa Kiya Bade-Bade Gaddho Ke Samne, Lekin Subhan’Allah ! Log Aise Pukhta Emaan Laaye They Aur Unohne Sabr Kiya Emaan Laaney Ke Baad, Ke Jab Unhe Laakar Gaddho Ke Aage Khada Karke Pucha Jaata Ke Allah Par Emaan Latey Ho Ya Baadshah Par?
Wo Kehte Allah Par, Tou Usey Uthakar Phenk Diya Jata Jalte Hue Gaddhe Me”.

*Azeez Dosto ! Yeh Koi Mazak Nahi Jo Inn Sab Ne Sabr Kiya ! Emaan Ke Khatir Shahadat Ko Pasand Kiya Lekin Bateel Ki Pairwi Karna Hargiz Pasand Na Kiya.
Piche Ke Insan Khade Jo Dekh Rahe Hai Ke Unke Azeez Jal Kar Marr Rahe Hai Fir Bhi Wo Apne Emaan Par Datey Rahe. Hatta Ke Tamaam Basti Walo Ko Jalakar Shaheed Kiya Gaya Lekin Kisi Ne Bhi Kufr Ko Imaan Par Tarzi Naa Di.

» Haq Par Shahadat Ke Khatir Allah Ne Maasoom Bacche Se Qalaam Karwaya
Aakhir Me Ek Aurat Thi Jsike Seene Se Ek Doodh Piti Umr Ka Baccha Laga Tha, Usne Ye Socha Ke Mai Apne Bacche Ke Liye Jhuth Bol Deti Hu. Ab Tou Koi Dekhne Wala Bhi Nahi Meri Taraf Sabhi Tou Shaheed Ho Chuke Hai Jo Emaan Laye They. Mai Jhuth Bolkar Iss Masoom Ki Zindagi Bacha Saku.
Jab Yeh Niyat Uss Aurat Ne Ki Tou Allah Rabbul Izzat Ne Uss Bacche Ko Zaban Di Aur Uss Bacche Ne Kaha Ke – “Aye Meri Maa ! Tu Haq Par Hai.. Tu Bhi Kood Ja Iss Aag Me”.
Lihaja Wo Aurat Fouran Hi Uss Bacche Ko Lekar Uss Aag Me Kood Gayi.
Aap (Sallallahu Alaihay Wasallam) Farmatey Hai –
“Aise Char(4) Bacche Hue Jinhone Aisi Umr Me Baat Ki Jis Umr Me Bacche Baat Nahi Karte.
» 1. Isa (Alaihay Salam)
» 2. Yusuf (Alaihay Salam) Ke Waqaye Ke Andar Jis Ne Zulekha Ke Khilaf Gawahi Di Thi Wo Baccha.
» 3. Juraiz Ka Tawwel Waqiya Hai Usme Ek Bacche Ne Gawahi Di Thi Woh Baccha.
» 4. Aur 4th “Asahbe Ukhdood” Ka Nanha Baccha Jisne Apni Maa Ko Haq Par Honey Ki Gawahi Dekar Usey Aag Me Kudne Ko Kaha.
(Muslim Shareef – @[156344474474186:])

# SABAQ: Ab Gour Karte Hai Iss Waqye Me Sabr Ki Kya-Kya Naseehate Thi.
• 1.Sabse Pahle Uss Raahib Ka Sabr ! Usey Pata Tha Ke Agar Me Haq Ki Daawat Dunga Tou Mujh Par Musibat Aaney Waali Hai. Fir Bhi Usne Apne Emaan Ko Chupaya Nahi Aur Bacche (Ladke) Ko Hikmatan Taalim Di Aur Emaan Bataya.

• 2. Dusra Uss Wazeer Ka Emaan Dekhiye Aur Uska Sabr Dekhiye, Ke Usne Apne Wizarat Ko Balaye Taak Rakh Diya, Wazeer Ke Oundhe(Post) Ko Pairo Taley Kuchal Diya Lekin Apne Emaan Se Piche Na Hataa. Chahe Maar Do Ya Qatl Kardo, Aur Woh Bhi Qatl Kar Diya.

• 3. Uss Noujawan Bacche Ka Sabr Dekhiye Ke Allah Ne Ussey Hikamt Di Thi Ek Usne Apni Jaan De Di Deen-e-Haq Ki Daawat Ke Liye Aur Khudko Raah-e-Haq Par Qurbaan Kar Diya.

• 4. Uss Purey Basti Waalo Ki Qurbani Dekhiye, Bada-Chota, Aurat-Mard Aur Har Shakhs Ne Emaan Ke Khatir Qurbaan Hona Pasand Kiya Lekin Apne Emaan Ko Na Choraa.

• 5. Aur Aakhir Me Uss Aurat Ki Aur Uss Masoom Bacche Ki Qurbani Dekhiye Ke Uss Nanhe Bacche Ne Bhi Emaan Ke Liye Marna Pasand Kiya Lekin Kufr Ki Zindagi Pasand Nahi Ki.
Tou Iss Waqaye Me Har Fard Ke Liye Azeem Se Azeem Naseehat Hai. Har Positions Ke Liye Ibratnaak Sabaq Tha.

– Lihaza Musibato Par Sabr Karna Aur Allah Ka Shukr Ada Karte Hue Aefiyat Ki Dua Karna Sacche Momin Ki Sifat Hai ..
Allah Ta’ala Hume Kehne Sun’ne Se Jyada Amal Ki Taufiq De.. Ameen !!!

*Apne Mobile par Daily Hadith Notifications Pane ke liye Ummat-e-Nabi App ko Install Kare
» https://goo.gl/U5oXx2

Views: 24237

Leave a Reply

Be the First to Comment!

Notify of
avatar

wpDiscuz